Канада АҚШ босқинига қарши тайёргарлик кўрди – Марк Карни

Канада охирги бир йил давомида АҚШнинг мамлакатга қарши ҳарбий операцияси сценарийсига тайёргарлик кўргани маълум бўлди. Бу ҳақда Канада Бош вазири Марк Карни “The New York Times” газетасига берган интервьюсида гапирди.

“Мен шундай лавозимни эгаллаб турганда фавқулодда паст эҳтимолли рискларни (tail risk – юз бериш эҳтимоли жуда паст бўлган, аммо эътиборсиз қолдириб бўлмайдиган хавфлар – таҳр.) ҳисобга олишга мажбурсиз деб ҳисоблайман”, дейди Карни Президент Дональд Трампнинг Канадани 51-штатга айлантириш ҳақидаги таҳдидларини жиддий қабул қиласизми, деган саволга жавоб берар экан.

Карнининг айтишича, бу асосий сценарий эмас, бироқ воқеаларнинг бундай ривожланишига тайёргарлик кўрмаслик масъулиятсизлик бўлар эди.

Қайд этиш жоиз, Трамп Канадани Американинг 51-штатига айлантириш истаги борлигини бир неча бор таъкидлаган.

“Мен Канадани яхши кўраман. Очиғини айтганда, Канада 51-штат бўлиши керак. Ҳақиқатан ҳам шундай бўлиши керак, чунки Канада бутунлай Қўшма Штатларга қарам. Биз эса Канадага қарам эмасмиз”, деган эди Оқ уй раҳбари ўтган йилнинг ёзида.

АҚШ 28 миллиард долларлик Канада товарларига 50 фоизлик божлар жорий этган, Канада эса сентябрь бошида жавоб тарифларини киритди.

Бош вазирнинг айтишича, Оттава муҳим технологиялар соҳасида – космик сунъий йўлдошлардан тортиб қирувчи самолётларгача, шу жумладан Илон Маскка тегишли Starlink сунъий йўлдош алоқа тизимигача бўлган йўналишларда Вашингтонга қарамликни тизимли равишда камайтирмоқда. Канада, шунингдек, Американинг F-35 қирувчи самолётларини харид қилишга муқобил вариантларни кўриб чиқмоқда.

Эслатиб ўтамиз, аввалроқ Европа Комиссияси раҳбари Урсула фон дер Ляйен Канадага биринчи ассоциациялашган аъзо бўлишни таклиф қилганди. Америка Президенти бунга жавобан блокка савдо урушининг янги босқичи билан таҳдид солди.