Кам таъминланган оилаларнинг хусусий боғча тўлови қисман қопланади

Ўзбекистонда кам таъминланган оилалар фарзандлари учун хусусий болалар боғчаси тўловининг бир қисми қоплаб берилади. Бу ҳақда “Камбағал оилалар реестри”га киритилган оилаларнинг фарзандларини қабул қилган оилавий нодавлат мактабгача таълим ташкилотларига ушбу болалар таъминоти учун ота-оналар тўловининг бир қисмини Давлат бюджетидан қоплаб бериш тартиби тўғрисида”ги низомда сўз боради.

Қайд этилишича, ота-оналар тўловининг бир қисми давлат бюджетидан қоплаб бериладиган айрим тоифадаги оилаларнинг фарзандлари рўйхати ахборот тизими орқали автоматик равишда шакллантирилади.

Айрим тоифадаги оилаларнинг ота-оналар тўловини қоплаш учун оилавий МТТга компенсация тегишли ҳудудда 9 соатлик иш режимидаги умумий типдаги давлат мактабгача таълим ташкилотлари учун белгиланган ота-оналар тўловининг 40 фоизи миқдорида ажратилади.

Компенсация оилавий МТТга ҳақиқатда қатнаётган айрим тоифадаги оилалар фарзандлари сонидан келиб чиқиб, бироқ Мактабгача ва мактаб таълими вазирлиги билан оилавий МТТ ўртасида тузилган битимда белгиланган ўринларнинг 15 фоизидан кўп бўлмаган қисмига ажратилади.

Эслатиб ўтамиз, аввалроқ Кам таъминланган оилаларга электр ва газ тўловларида давлат компенсацияси жорий этилиши маълум қилинганди.