Кадастрлар палатаси филиали раҳбари пора билан ушланди

Давлат кадастрлар палатаси филиали раҳбарига нисбатан жиноят иши қўзғатилди. Бу ҳақда Давлат хавфсизлик хизмати хабар берди.

Қайд этилишича, Давлат кадастрлари палатасининг Фарғона вилояти туманларидан биридаги филиали раҳбари фуқаронинг ноқонуний қурилган савдо дўконига нисбатан Кадастр агентлигининг туман бўлими томонидан тузилган далолатномани бекор қилдириб, қонуний чора кўрилмаслигини таъминлаш эвазига жорий йилнинг июль ойи бошларида 600 АҚШ доллари олган.

Бироқ, мансабдор шахс ваъдасини бажармасдан, фуқарога 500 АҚШ доллари қайтариб берган.

ДХХ ва Бош Прокуратуранинг Иқтисодий жиноятларга қарши курашиш департаменти ходимлари томонидан ушбу ноқонуний ҳолат фош этилиб, кадастрлар палатаси филиали раҳбарига нисбатан жиноят иши қўзғатилган.

Билдирилишича, ҳозирда дастлабки тергов ҳаракатлари олиб борилмоқда.

Эслатиб ўтамиз, аввалроқ Наманган шаҳрининг собиқ ҳокими Анваржон Отахўжаев Жиноят кодексининг бир нечта моддалари билан 11 йилга қамалганди.