Қўрқинчли йўллар: Ўзбекистонда 3 ойда неча киши ЙТҲ қурбони бўлди?

Жорий йилнинг январь-март ойларида Ўзбекистонда содир бўлган йўл-транспорт ҳодисалари натижасида 394 киши ҳалок бўлди ва 1168 киши жароҳат олди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.

Вазирлик маълумотларига кўра, жорий йилнинг январидан мартигача бўлган вақт ичида расмий равишда қайд этилган бахтсиз ҳодисалар сони 1491 тани ташкил этган. Уларнинг 602 таси пиёдалар, 162 таси велосипедчилар, 95 таси болалар ва яна 10 та ҳолат мотоциклчилар иштирокида содир бўлган. Рўйхатдан ўтказилган ЙТҲда 394 киши ҳалок бўлган. 1168 киши турли даражадаги тан жароҳати олган.

Статистик маълумотларга кўра, бахтсиз ҳодисаларнинг аксарияти Фарғона вилоятида қайд этилган. У ерда жорий йилнинг биринчи чорагида 210 та йўл-транспорт ҳодисаси юз берган. Тошкент вилоятида Фарғона вилоятига қараганда атиги иккита автоҳалокат кам бўлган. Тошкент шаҳрида эса 170 та йўл-транспорт ҳодисаси содир бўлган.

Ўзбекистонда йўл-транспорт ҳодисаларининг асосий сабаблари: 

• маст ҳолатда рулда бўлиш – 2,6%;
• ҳайдаш пайтида ухлаб қолиш – 3,3%;
• ҳайдаш тажрибасининг етарли бўлмаслиги – 5,8%; 
• сифатсиз йўл ва носоз транспорт воситаси туфайли – 4,2%;
• велосипед учун махсус йўлканинг йўқлиги – 4,2%; 
• қарама-қарши йўлга чиқиш – 7,6%;
• устунликка эга транспортга йўл бермаслик – 12,4%;
• пиёдалар ўтиш жойларининг етишмаслиги – 15,3%; 
• тезликни ошириш – 37,8%.