Қўқонда новвойхона ярим млрд сўмлик газни талон-торож қилди

Фарғона вилоятининг Қўқон шаҳрида новвойхона табиий газ тармоғига ноқонуний уланган ҳолда газдан фойдаланиб келгани аниқланди. Ҳолат бўйича 496 миллион сўмлик табиий газ қайта ҳисоб-китоб қилинди. Бу ҳақда “Ҳудудгазтаъминот” АЖ хабар берди.

Қайд этилишича, “Ҳудудгаз Фарғона” Газ таъминоти филиали комплаенс назорат тузилмалари, шаҳар газ таъминоти бўлими ходимлари ҳамда ҳуқуқ-тартибот органлари ҳамкорлигида Қўқон шаҳрида назорат тадбири ўтказилган.

Текширув давомида шаҳарнинг “Зиёлилар” МФЙда жойлашган новвойхона лойиҳа-техник ҳужжатларисиз табиий газ тармоғига ўзбошимчалик билан уланган ҳолда газдан ноқонуний фойдаланиб келаётгани аниқланган.

Ҳолат юзасидан далолатнома тузилиб, 496 миллион сўмлик табиий газ ҳажми қайта ҳисоб-китоб қилинган. Тўпланган барча ҳужжатлар ҳуқуқни муҳофаза қилувчи органларга юборилган.

Эслатиб ўтамиз, аввалроқ Фарғона вилоятида ўтказилган назорат тадбирлари давомида табиий газдан ноқонуний фойдаланиш билан боғлиқ икки ҳолат аниқланган эди.