“Ғузор тандир гўшти” географик кўрсаткич сифатида патентланди

Жорий йилнинг 8 январь куни “Ғузор тандир гўшти” географик кўрсаткич сифатида Ўзбекистон Республикаси Адлия вазирлиги томонидан давлат рўйхатидан ўтказилди. Бу ҳақда Қашқадарё вилоят ҳокимлиги ахборот хизмати хабар қилди.

Қашқадарё вилоятида биринчи бўлиб давлат рўйхатидан ўтказилган ушбу географик кўрсаткичдан фойдаланиш ҳуқуқини тасдиқловчи гувоҳнома унинг эгаси, яъни Ғузор туман ҳокимлигига гувоҳномада кўрсатилган товар турига нисбатан фойдаланиш ҳуқуқини беради.

 Ҳокимликнинг қайд этишича, географик кўрсаткичлар сонининг ошиши ҳудудларда туристик оқимнинг кўпайишига, “гастрономик туризм”ни ривожлантиришга ва умуман, ҳудудларнинг туристик жозибадорлигини оширишга ёрдам беради.

Эслатиб ўтамиз, олдинроқ “Ғиждувон шашлиги” географик кўрсаткич сифатида патентланганди. Бу ҳақда туман ҳокими Шерзод Ашуров Ўзбекистон мустақиллигининг 32 йиллиги муносабати билан туманда ўтказилган байрам тадбирида айтиб ўтган эди.