ГАИ ходимларидан қочган ҳайдовчи автомобилини хизмат машинасига урди (видео)

Қашқадарё вилояти Чироқчи туманида йўл-патруль хизмати ходимларининг қонуний талабига бўйсунмай, қочишга уринган ҳайдовчи патруль автомобилига урилиб, йўл транспорт ҳодисаси содир этганидан сўнг ушланди. Бу ҳақда кеча, 12 август куни вилоят Ички ишлар бошқармаси хабар берди.

Маълум қилинишича, тунги хизматга жалб қилинган йўл-патруль хизмати инспекторлари Nexia-2 русумли автомашинани ҳужжатларини текшириш мақсадида тўхтатмоқчи бўлган. Бироқ ҳайдовчи ходимнинг тўхташ ишорасига бўйсунмай, ҳаракатини давом эттирган.

Кейинги чорраҳада хизмат олиб бораётган бошқа ЙПХ ходими ҳам ҳайдовчига бир неча бор тўхташ ишорасини берган. Шунга қарамай, у Ички ишлар органлари ходимларининг қонуний талабларини бажармасдан, ҳаракатни давом эттирган.

Шундан сўнг патруль экипажи қарама-қарши йўналишда ҳаракатланиб келаётган Nexia-2 автомашинасининг йўлини хизмат автомобили ёрдамида тўсишга уринган. Бироқ ҳайдовчи патруль автомобилига урилиб, ЙТҲ содир этган ва яна воқеа жойидан яширинишга уринган.

Кўрилган тезкор чора-тадбирлар натижасида ҳайдовчининг шахси аниқланиб, у қўлга олинган.

Ҳолат юзасидан ҳайдовчи ўз хатти-ҳаракатини изоҳлаб, ҳужжатлари йўқлиги сабабли ЙПХ ходимларидан қўрққанини, уларга бўйсунмасдан қочиб кетганини билдирган. Шунингдек, қилган ишидан афсусда эканини ва бундай ҳолатни такрорламаслигини айтган.

Ҳозирда мазкур ҳолат юзасидан Чироқчи тумани Ички ишлар бўлими томонидан терговга қадар текширув ишлари олиб борилмоқда.

Эслатиб ўтамиз, Тошкент шаҳрида йўл-патруль хизмати ходимларидан қочган 26 ёшли мотоциклчи 15 суткага қамалгани ҳақида хабар берилган эди.