Эрон аҳолиси АҚШнинг ядровий ҳужумига тайёрланяпти – ОАВ

Эрон ҳокимияти АҚШнинг ядровий зарбаси хавфи фонида ядровий объектлар яқинидаги ҳудудлар аҳолисига йод таблеткаларини тарқатмоқда ва аҳолини эҳтимолий радиацион аварияга тайёрламоқда. Бу ҳақда Эрон Соғлиқни сақлаш вазирлигининг исми ошкор этилмаган ходимига таяниб, “The Times” нашри ёзмоқда.

Унинг сўзларига кўра, ҳар бир уруш пайтида препарат ядровий объектлардан 2–3 км радиусда тарқатилади. Нашр ҳозирги тарқатиш қачон бошлангани ва қайси объектларни қамраб олганига аниқлик киритмаган.

Нашр суҳбатдоши ушбу эҳтиёт чораларини Америка Президентига бўлган ишончсизлик билан изоҳлаган. 

“Трампга энди ишониб бўлмайди. У охиригача бориши мумкин”, дейди.

“The Sun” нашри эса ўз навбатида, Эрон ҳокимияти Натанз яқинидаги Пикакс (Кирка, Кўҳ-е Коланг) тоғида жойлашган мустаҳкамланган ерости мажмуасига бериладиган зарба ҳолати учун видеойўриқнома тарқатгани ҳақида хабар бермоқда. Аҳолига бино ичига яшириниш, ташқарига чиқмаслик ва янгиликларни кутиш тавсия этилмоқда. Роликда айтилишича, зарба атмосферага радиоактив тупроқ ва жинсларни отса, шамол чангни катта масофаларга тарқатиб юбориши мумкин. Объектга энг яқин яшайдиганларда яшириниш учун фақат 10–15 дақиқа вақт қолиши мумкин.

Эрон ҳокимияти йод тарқатишни илгари ҳам ўтказган. Апрель ойида “Fars” агентлиги Бушердаги АЭС атрофида бу жараён 2025 йил июль ойидаги 12 кунлик урушдан олдинроқ бошлангани ва у ерда жами 180 минг дона таблетка тарқатилгани ҳақида хабар берган. Шу билан бирга, мулозимлар препаратни шифокорлар кўрсатмасисиз қабул қилиш мумкин эмаслигидан огоҳлантиради. 

Эслатиб ўтамиз, аввалроқ Эрон давлат телевидениеси мамлакатга ядровий зарба берилган тақдирда аҳоли қандай ҳаракат қилиши кераклиги ҳақида махсус огоҳлантириш бергани ҳақида хабар қилинган эди. Хусусан, фуқароларга портлаш вақтида қаерга яшириниш, ўзини радиациядан қандай ҳимоя қилиш ва бошпанадан қачон чиқиш мумкинлиги бўйича тавсиялар тақдим этилган.