Эквадор собиқ президенти 5 йилга қамалди

Бугун, 29 август куни Эквадорнинг собиқ президенти Ленин Морено Хитойнинг “Sinohydro” компанияси томонидан “Coca Codo Sinclair” гидроэлектр станцияси қурилишидаги коррупция иши бўйича беш йилга озодликдан маҳрум этилди. Бу ҳақда “El Comercio” хабар берди.

Қайд этилишича, суд “Sinohydro” йирик суммадаги маблағларни тадбиркор Конто Патиньо билан боғлиқ компанияларга ўтказиб берганини аниқлаган. Сўнгра бу пуллар турли компаниялар ва шахслар, жумладан, Моренонинг қариндошлари ўртасида тақсимланган. Ишда номи тилга олинган компаниялардан бири орқали 76,18 миллион доллар ўтган.

Моренонинг рафиқаси Росио Гонсалес ва қизи Ирина жиноятга шерик деб топилган ҳамда икки йил-у олти ой муддатга озодликдан маҳрум қилинган. Яна тўрт нафар айбланувчи, жумладан, Патиньо ва Хитойнинг Эквадордаги собиқ элчиси Цай Жунго беш йилдан қамоқ жазоси олган.

Бундан ташқари, Моренога умрбод давлат лавозимларини эгаллаш тақиқланган. Шунингдек, маҳкумларга суд тахминига кўра ноқонуний равишда олинган сумманинг уч баравари миқдорида жарима тўлаш мажбурияти юкланган. Морено айбловларни рад этмоқда ва ноқонуний пул олмаганини таъкидламоқда. Унинг баёнот беришича, Хитойнинг “Эксимбанк” банки билан шартномани собиқ президент Рафаэль Корреа тузган, лойиҳани амалга ошириш билан эса собиқ вице-президент Хорхе Глас шуғулланган.

Маълумот учун, Морено 2007-2013 йилларда Рафаэль Корреа даврида Эквадор вице-президенти бўлган. 2017 йилда у президент этиб сайланган ва дастлаб Корреанинг иттифоқчиси ҳисобланган, аммо ҳокимиятга келгач, уларнинг йўллари айрилган. 2021 йилда Морено иккинчи муддатга ўз номзодини қўймаган. Унинг ўрнини сайловда ғалаба қозонган Гильермо Лассо эгаллаган.

Эслатиб ўтамиз, аввалроқ ҳуқуқ-тартибот идоралари ходимлари Арманистоннинг собиқ президенти Роберт Кочарянни қўлга олиб, Коррупцияга қарши курашиш қўмитасига олиб борганди ҳамда унинг уйида, шунингдек, мухолиф “Арманистон” блоги депутати бўлган ўғли Левон Кочаряннинг хонадонида тинтув ўтказганди.