Дурдона ва Сайёранинг қотилларига умрбод қамоқ сўралди

Туркиянинг Истанбул шаҳрида ўлдириб кетилган икки ўзбекистонлик аёл Сайёра Эргашалиева ва Дурдона Ҳакимова оид иш бўйича тергов якунланди. Ҳибсга олинган гумонланувчилар 31 яшар Дилшод Турдимуротов ва 29 яшар Ғофуржон Камолхўжаевга нисбатан оғирлаштирилган умрбод қамоқ жазоси сўралди.

Туркияда ушбу қотиллик катта резонанс келтириб чиқарган эди. Воқеаларнинг барча тафсилотларига тўхталсак. 24 январь куни соат 19:40 атрофида Истанбул шаҳрининг Шишли туманида чиқиндилар орасидан буюм тўплаб юрган фуқаро контейнер ичида ўралган жасадни топди.Экспертиза натижаларига кўра, ушбу жасад ўзбекистонлик 37 яшар Дурдорна Ҳакимованики экани аниқланди ва у 23 январь куни ўлдирилгани маълум бўлди. Дурдона Ҳакимованинг ортидан эса унинг дугона Сайёра Эргашалиева ҳам ўлдирилиб, унинг жасади ҳам бўлакланиб, Истанбулнинг турли туманларидаги ахлат қутиларига ташланган. Ҳозиргача Сайёра Эргашалиеванинг жасади бўлаклари топилганича йўқ. 

2025 йилнинг 28 декабрь куни ишлаш мақсадида Ўзбекистондан Туркияга келган 32 яшар Сайёра Эргашалиева билан 2026 йилнинг 23 январидан буён оиласи боғлана олмаган. Бу ҳақда ҳуқуқ-тартибот органларига келиб тушган хабар асосида олиб борилган қидирувларда Сайёранинг охирги марта ўзбекистонлик Дурдона Хакимова бўлаклаб ўлдирилган уйда қолгани аниқланган.

Тергов гуруҳи камера ёзувларини ўрганиб, 23 январь куни уйга кирган Сайёранинг ортидан Ҳакимованинг қотиллари Дилшод Турдимуротов ва Ғофуржон Камолхўжаев ҳам кирганини аниқлаган. Кузатув камераси ёзувларида 24 январь куни гумонланувчиларнинг уйдан бир неча бор қора чиқинди қоплари билан чиққани, сўнгра оқ рангли жомадон билан манзилни тарк этгани аниқланган.

Гумонланувчиларнинг тижорат таксисида Фотиҳ туманига келиб, жомадондаги тана қисмларини бир чиқинди контейнерига ташлагач, Еникапи Мармарай бекатига пиёда кетгани маълум бўлган. Тергов доирасида Дурдона Ҳакимованинг қотиллиги сабабли ҳибсда сақланаётган Дилшод Турдимуротов ва Ғофуржон Камолхўжаев билан ўтказилган сўроқлар давомида Сайёра Эргашалиева ҳам 23 январь куни ўша уйда тиғли жисм билан ўлдирилгани, жасади эса бўлакланиб, Истанбулнинг турли туманларидаги чиқинди контейнерларига ташлаб кетилгани аниқланди.

Дурдона Ҳакимованинг жасади Ўзбекистонга юборилиб, дафн этилди, Сайёра Эргашалиева учун эса Истанбулда ғойибона жаноза намози ўқилди.