Дори воситаларига 10 фоиздан ортиқ устама қўйиш қонунга зид – Отабеков

Дорихоналарда дори нархини давлат белгилайдими ёки йўқ? Нарх-навони ким назорат қилади? Ижтимоий дорихоналардаги нарх хусусий дорихоналарникидан нега қиммат? Ушбу саволлар билан Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабековга мурожаат қилинди.

“Ижтимоий дорихоналар фолияти Вазирлар Маҳкамасининг 2018 йил 3 майдаги 334-сонли қарорига мувофиқ ташкил этилган. Ўзбекистон Республикаси Президентининг 2016 йил 31 октябрдаги 26/47-сонли қарорида ушбу тоифага кирувчи дорихоналар дори воситаларига устамани 10 фоиздан оширмаслиги белгилаб қўйилган.

Ўзбекистон Республикаси Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги зиммасига дори-дармон воситалари ҳамда тиббиёт буюмларини улгуржи ва чакана савдо нархини давлат томонидан белгиланган тартибга риоя этилиши устидан назорат қилиш вазифаси юклатилган”, деди Нурмат Отабеков.