“Даҳшатли воқеа”. АҚШдаги аттракционда бир киши ҳалок бўлди, жароҳатланганлар бор

АҚШнинг Жоржия штатидаги Six Flags Over Georgia кўнгилочар боғида роликли аттракцион билан боғлиқ ҳодиса юз бериши оқибатида бир киши ҳалок бўлди, яна бир неча киши жароҳатланди. Бу ҳақда “Associated Press” хабар берди.

Маълум қилинишича, ҳодиса кеча, 12 октябрь куни Атлантадан тахминан 24 километр шимоли-ғарбийда жойлашган кўнгилочар боғда содир бўлган. Ҳозирча ҳалок бўлган шахснинг қандай вафот этгани ва бошқа одамларнинг жароҳатланишига нима сабаб бўлгани очиқланмаган. Кобб округи полицияси ҳодиса юзасидан тергов олиб бормоқда.

Six Flags маъмурияти ҳодисага маҳаллий расмийлар билан биргаликда зудлик билан муносабат билдирганини ва терговда ҳуқуқ-тартибот идораларига тўлиқ ёрдам бераётганини маълум қилган.

“Боғимизда юз берган ушбу ҳодисадан чуқур қайғудамиз”, дейилади компания вакили баёнотида.

Расмийлар ҳодиса қайси аттракционда юз берганини ҳозирча тасдиқламаган. Бироқ маҳаллий телеканаллар Goliath роликли аттракционидаги йўловчилар эвакуация қилинаётганини кўрсатувчи видеоларни намойиш этган.

Боғ сайтида келтирилишича, 2006 йилда очилган Goliath аттракциони соатига 113 километр тезликка чиқади ва 61 метр баландликка кўтарилади. Тахминан 3,5 дақиқа давом этадиган сайр вақтида йўловчилар кескин бурилишлардан ўтади ва баланд тепаликлар устидан ҳаракатланади.

Кобб округи комиссарлари кенгаши раиси Лиза Кюпид ҳалок бўлган шахснинг яқинларига ҳамдардлик билдирган. Унинг айтишича, марҳумнинг оила аъзоларига бу ҳақда хабар берилган.

“Бугун ташриф буюрувчилар ва ходимлар қандай даҳшатли воқеага гувоҳ бўлганини тасаввур ҳам қила олмайман. Яқинини йўқотган оиланинг дардига шерикман”, деган у.

Маълумотларга кўра, бу Жоржиядаги Six Flags кўнгилочар боғида қайд этилган камида еттинчи ўлим ҳолати бўлиши мумкин. 2006 йилда ҳам Goliath аттракционида учган эркакнинг юрак хуружига учрагани тахмин қилинган.

Ўтган йили ҳам Флорида штатидаги Universal Epic Universe кўнгилочар боғида юқори тезликда ҳаракатланувчи аттракционда учган 32 ёшли эркак ҳалок бўлган. Текширувда унинг ўлимига тўмтоқ жисм таъсирида олинган жароҳатлар сабаб бўлгани аниқланган ва ҳодиса бахтсиз ҳодиса деб топилган.

Эслатиб ўтамиз, аввалроқ Ҳиндистоннинг Фаридаобод шаҳридаги кўнгилочар аттракцион қулаб тушганди.