Чирчиқда 19 ва 17 яшар қизлар наркотик тарқатаётганда қўлга тушди (видео)

Тошкент вилоятининг Чирчиқ шаҳрида синтетик гиёҳвандлик воситаларини интернет орқали сотиш билан шуғулланган шахслар қўлга олинди. Бу ҳақда Ички ишлар вазирлиги хабар берди.

Қайд этилишича, ИИВ Тезкор-қидирув департаменти томонидан ўтказилган тадбирларда 2006 йилда туғилган қиз ва унинг 2008 йилда туғилган вояга етмаган шериги синтетик гиёҳвандлик воситаларини тарқатаётган вақтда ушланган. Текширувда вояга етмаган қиз ижарада яшаб, сотиш мақсадида 1 кг 259 грамм синтетик гиёҳвандлик воситасини сақлаётгани аниқланган.

Тезкор тадбирлар давомида Чирчиқда яшовчи яна бир шахс 2009 йилда туғилган вояга етмаган қизни жиноий фаолиятга жалб қилгани маълум бўлган. У 1988 йилда туғилган аёл билан бирга “закладка” усулида 150 грамм синтетик гиёҳвандлик воситасини тарқатаётган вақтда қўлга олинган.

Уларнинг яшаш хонадонлари кўздан кечирилганда, 2 килограмм 850 грамм “мефедрон”, 200 грамм “Альфа-ПВП” ва 200 грамм “героин”, шунингдек, гиёҳвандлик воситаларини қадоқлашда ишлатиладиган пакетлар, изоляцион лента ва тарозилар топилган.

Шунингдек, интернет орқали фаолият юритган наркодўконга алоқадор бошқа шахсларни аниқлаш бўйича тадбирлар ўтказилган. Қибрай туманида тарқатиш мақсадида гиёҳвандлик воситаларини тўртта манзилга яширишга уринган шахслар аниқланган. Уларнинг орасида талабалар ҳам бор.

ИИВ маълумотига кўра, ўтказилган тадбирлар натижасида жами 4 килограмм 700 грамм гиёҳвандлик воситаси мусодара қилиниб, уларнинг ноқонуний тарқатилишининг олди олинган. Билдирилишича, ҳозирда наркодўкон фаолиятига алоқадор бошқа шахсларни аниқлаш бўйича тезкор тадбирлар давом эттирилмоқда.

Эслатиб ўтамиз, аввалроқ Тошкент шаҳрида яширин усулда тарқатиш учун тайёрланган 1,7 килограммдан ортиқ синтетик гиёҳвандлик воситалари мусодара қилингани ҳақида хабар берилган эди.