ChatGPT тавсияси билан дори ичишни тўхтатган аёл вафот этди

ChatGPT тавсияларига амал қилиб, тутқаноққа қарши дорини қабул қилишни тўхтатган 31 ёшли аёл вафот этди. Унинг ота-онаси OpenAI компаниясини судга берди. Уларнинг даъвосига кўра, чат-бот қизига дорининг дозасини камайтириш режасини тузиб берган ва бу ҳақда шифокорларга айтмасликни тавсия қилган. Бу ҳақда “The New York Times” хабар берди. 

Қайд этилишича, Боуэн Ван исмли аёл эпилепсиянинг оғир турига чалинган бўлиб, Amazon компаниясида дастурчи бўлиб ишлаган. Ота-онасининг даъво аризасида келтирилишича, у 2026 йил январь ойида ChatGPT’дан тутқаноққа қарши ламотриджин препаратининг кунлик 400 миллиграммлик дозасини камайтириш мумкинлиги ҳақида сўраган. Ваннинг айтишича, дори унинг нутқи ва фикрлаш тезлигига таъсир қилган. Шу билан бирга, Amazon’даги ишидан айрилган аёл АҚШда қолиш имконини сақлаб қолиш учун февраль ойи ўрталаригача янги иш топиши керак бўлган.

Даъво аризасида таъкидланишича, ChatGPT унга бир неча ҳафта давомида дори дозасини босқичма-босқич камайтириб, охирида бутунлай тўхтатиш имконини берадиган жадваллар тузиб берган. Шунингдек, чат-бот дори қабул қилишни тўхтатиш режасини шифокордан яширишни ҳам маъқуллаган.

“The New York Times” нашри Ваннинг чат-бот билан ёзишмаларини ўрганган. Нашр маълумотларига кўра, аёл дорини тўхтатиш билан боғлиқ хавотирлари ҳақида ChatGPT билан камида 158 марта гаплашган. У фикрлашдаги узилишлар ва ўқишдаги қийинчиликлардан шикоят қилганида, чат-бот бу ҳолатларни миянинг янги шароитга мослашиш жараёни билан изоҳлаган. Ван ҳаётининг сўнгги кунларида дорини яна қабул қилиши керакми, деб сўраганида, чат-бот унга қуйидагича жавоб берган:

“Эртага дозани 0 миллиграммда сақланг. Бугун ўзингизни ёмон ҳис қилган бўлсангиз ҳам, нутқ суст бўлса ҳам, уйқу ёмон бўлса ҳам, бардош беришингиз керак”.

Ван 2026 йил февраль ойида вафот этган. Расмий хулосада унинг ўлими эпилепсия билан боғлиқ тўсатдан кутилмаган ўлим сифатида қайд этилган. Ота-онасининг даъво аризасида ChatGPT лицензиясиз тиббий маслаҳат бергани, шунингдек, шифокорларни ёрдам сўраш мумкин бўлган мутахассислар эмас, балки режага тўсқинлик қилувчи шахслар сифатида кўрсатгани айтилган.

OpenAI вакили Дрю Пусатери ушбу ҳолатни “ақл бовар қилмас даражада юракни эзадиган” воқеа деб атаган. У Ван фойдаланган GPT-4o модели ChatGPT’нинг аввалги версияси эканини таъкидлаган. Мазкур модель 2026 йил 13 февралда иловадан олиб ташланган.