Centrum Air’дан чипта олган йўловчилар сарсон бўлди (видео)

Ижтимоий тармоқларда Centrum Air авиакомпаниясига нисбатан эътирозли мурожаатлар эълон қилинди. Хусусан, актирса Баҳора Арслонова ушбу компаниядан чипта олиб, манзилига уча олмаганини айтиб чиқди.

“На йиғлашни, на кулишни биламан. Самарқанддан Тошкентга кетиш учун мана шу Centrum Air’дан онлайн билет сотиб олган эдим. Соат еттида учиб кетадиган самолётимиз кечикади, деди. Мен соат тўрт ярим, бешлар чамасида келдим-да, нимага кечикади, деб эшитсам, ҳа, олтида очилади, кечикаяпти самолёт, унгача ўтириб туринг, олтида очилади, дейишди. Ҳа, дедим. Мен олтигача ўтириб турдим. Олтида очилди. Касса очилгандан кейин мен бордим-да, билет олдим. Менга билет беришди. Кейин ичкарига киряпман, ичкарида мени қайтаришди. Нимага қайтаряпсизлар, десам, фамилиянгиз нотўғри, тўғрилаб келинг фамилиянгизни, деди. Келсам, умуман бошқа бир аёлнинг билетини менга беришган. Кейин айтдим, мени фамилиямни нотўғри ёзибсиз, бошқатдан беринг билет, десам, сизнинг билетингиз бекор бўлган, дейди. Қанақасига 600 минг сўм пулимни олди, нимага бекор бўлади, деб SMS келмади, кечикади, деб S келди. Нимага унақа қиляпсизлар, десам, йўқ, билмаймиз, бизда бекор бўлган. Қўнғироқлар марказига телефон қилинг, улар билишади, биз билмаймиз, деди. Вой, қанақасига? Улар билишмаса мен қаердан билишим керак? Мана 600 мингга олган билетим, мана Centrum Air’ми, нимадир деган компания, шунақа гапирганим ҳам келмаяпти жаҳлим чиққанидан. Ҳозир Тошкентга боришим керак, съёмкам бор, ундан ташқари хизматим бор. Мен энди қанақа қилиб кетаман?” дейди ўз мурожаатида актриса.

Ижтимоий тармоқларда ушбу компания билан боғлиқ яна бир видеомурожаат тарқалди. Унда Туркиядан Ўзбекистонга учиши керак бўлган йўловчи билан муаммо келиб чиққан.

“Биз ҳозир Трабзон аэропортидамиз. Қўлингизда билет бўла туриб, учиб кета олмасликни мана шу ерда кўряпман, биринчи марта. Centrum Air’дан биз билет олганмиз, бориш-келишга. Бугун учиб кетишимиз керак, лекин бизнинг билет шунчаки бошқа одамга сотилган. Яъни, битта самолётнинг билети бошқа инсонларга ҳам сотиларкан. Ҳозир биз келсак, қўлимизда билет, лекин жой йўқ ва сизларни бошқа самолётга ўтказишимиз мумкин, бошқа соат ва Истанбул орқали боришларингиз керак. Мен Centrum Air’га тушунмадим. Бу қанақа сервис? Мен пулимга билет сотиб олганман. Мен ҳозир аэропортда турибман. Масалан, қўлимда бир сўм пулим йўқ ва уйда мени болаларим кутяпти, боришим керак. Ҳаммани ўзини режалари бўлади. Кимнинг нима ҳаққи бор менинг билетимни яна кимгадир сотишга? Режаларимиз, вақтимиз, ҳамма нарса шунга қаратилган эди ва 220 талик самолётда 240 кишига билет сотилган. Бу дегани 20 киши нима қилади? Алмашиб, вақтини ўзгартириб, сарсон бўладими?” дея савол қўйган йўловчи. 

Ушбу ҳолатлар юзасидан компания муносабат билдирди.

Қайд этилишича, биринчи ҳолатда йўловчи агрегатор сервис орқали тўлов қилган, бироқ маблағ авиакомпанияга келиб тушмагани сабабли бронь автоматик бекор қилинган. Вазият аниқлангач, агрегатор билан боғланилиб, йўловчига маблағ қайтарилган.

Иккинчи ҳолатда эса техник сабабларга кўра ҳаво кемасини зудлик билан алмаштириш зарурати юзага келган. Йўловчилар белгиланган тартибда меҳмонхона, овқатланиш, компенсация ва янги авиачипталар билан таъминланган.

“Centrum Air учун ҳар бир йўловчининг ишончи муҳим. Юзага келган ноқулайликлар учун узр сўраймиз ва барча мурожаатларни тезкор ҳал қилишга ҳаракат қиламиз”, дейилади муносабатда.

Қайд этиш жоиз, бунгача ҳам ушбу компаниянинг Умра сафарлари ва чартер рейслар билан боғлиқ муаммолари сабабли эътирозлар билдирилган.

Эслатиб ўтамиз, хусусан, 2025 йилнинг декабрида Centrum Air авиакомпаниясига тегишли самолётда юзага келган техник носозлик туфайли Қозон-Тошкент йўналиши бўйича учиши керак бўлган рейс 27 соатга кечиктирилганди. Оқибатда 200 дан ортиқ йўловчи Қозон халқаро аэропорти ҳудудида қолиб кетган.