Азиз Абдуҳакимов Президент маслаҳатчиси бўлди 

Азиз Абдуқаҳҳорович Абдуҳакимов Ўзбекистон Республикаси Президентининг экология масалалари бўйича маслаҳатчиси – Экология ва иқлим ўзгариши миллий қўмитаси раиси лавозимига тайинланди. Бу ҳақда Ўзбекистон Республикаси Президенти Шавкат Мирзиёевнинг фармони қабул қилинди.

Тайинлов муносабати билан Азиз Абдуҳакимов Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири лавозимидан озод этилди.

Маълумот учун, Азиз Абдуҳакимов Табиат ресурслари вазири сифатида ишлаган. У 2023 йилдан бери Экология, атроф-муҳитни муҳофаза қилиш ва иқлим ўзгариши вазири сифатида ишлаб келаётганди. 

Эслатиб ўтамиз, олдинроқ Президентнинг тегишли фармони билан Экология, атроф-муҳитни муҳофаза қилиш ва иқлим ўзгариши вазирлиги Вазирлар Маҳкамаси тизимидан чиқарилиб, унинг негизида амалдаги штат бирликлари сақланган ҳолда, Экология ва иқлим ўзгариши миллий қўмитаси ташкил этилганди.