Автобус 45 нафар йўловчи билан жарликка қулади. Қурбонлар бор (видео)

Кеча, 14 декабрь куни Колумбия шимолида ичида болалар ва катталар бўлган мактаб автобуси жарликка қулаб тушди. Ҳодиса оқибатида камида 17 киши ҳалок бўлган, 20 нафари жароҳат олган. Бу ҳақда “Daily Mail” хабар берди.

Антиокия тумани губернатори Андрес Хулиан Рендоннинг айтишича, Антиокия ўрта мактаби ўқувчилари дарс вақтидан ташқари саёҳатга чиққан. Уларни олиб кетаётган автобус Кариб денгизи бўйидаги Толу шаҳридан Меделлин томонга қайтаётган бўлган.

Дастлабки маълумотларга кўра, 45 нафар йўловчиси бўлган автобус тахминан 80 метр чуқурликдаги жарликка қулаб тушган. Ҳодиса сабаблари аниқланмоқда. Мактаб маъмурияти саёҳат мактабга алоқадор бўлмаганини, уни битирувчи синф ўқувчиларининг ўзлари ташкиллаштирганини маълум қилган.

Сеговия шаҳри мэрининг айтишича, ёши 16 дан 27 гача бўлган жабрланганлар Сеговия ва Ремедиос шаҳарларидаги шифохоналарга жойлаштирилган.

Эслатиб ўтамиз, аввалроқ Саудия Арабистонининг Мадина шаҳри яқинида умра зиёратчиларини олиб кетаётган автобус дизель танкери билан тўқнашиб кетиши оқибатида камида 42 киши ҳалок бўлганди.