Аргентинада Лионель Месси шарафига ўйинлар тўхтатилади

Аргентина чемпионатининг барча даражаларидаги ўйинлар, шунингдек, “Бока Хуниорс” ва “Велес Сарсфилд” ўртасидаги Аргентина кубоги учрашуви Лионель Месси шарафига 10-дақиқадан сўнг тўхтатилади. Бу ҳақда Аргентина футбол ассоциацияси матбуот хизматига таяниб, “TyC Sports” телеканали  хабар берди.

Аввалроқ, саккиз карра “Олтин тўп” соҳиби Лионель Месси Аргентина миллий терма жамоасидаги фаолиятини якунлашга қарор қилгани ҳақида хабар берилган эди. Футболчи терма жамоа сафида 10-рақамли футболкада тўп тепган.

Шунингдек, Аргентина футбол ассоциацияси томонидан Мессига бағишланган махсус видео ўйинлар бошланишидан олдин стадионлардаги катта экранларда намойиш этилади.

39 ёшли Месси 2023 йилдан буён АҚШнинг MLS лигасида иштирок этувчи “Интер Майами” клуби сафида тўп тепиб келмоқда. Европада у Испаниянинг “Барселона” ҳамда Франциянинг ПСЖ клублари шарафини ҳимоя қилган.

Аргентиналик юлдуз клублар миқёсида тўрт марта Чемпионлар лигаси, уч мартадан UEFA Суперкубоги ва Клублар ўртасидаги Жаҳон чемпионати ғолиби бўлган.

Маълумот учун, Месси Аргентина терма жамоаси билан 2022 йилда жаҳон чемпиони бўлди, 2014 ва 2026 йилларда жаҳон чемпионатида иккинчи ўринни эгаллади. Шунингдек, у 2008 йилги Олимпия ўйинлари чемпиони, 2021 ва 2024 йилларда эса Америка кубоги ғолиби бўлган. Месси Аргентина миллий терма жамоаси сафида 207 та учрашув ўтказиб, 125 та гол урган. У ҳар икки кўрсаткич бўйича ҳам Аргентина терма жамоаси рекордчиси ҳисобланади.