Apple илк бор сенсор экранли MacBook Pro’ни тақдим этди

Apple компанияси тарихда илк бор сенсорли экран билан жиҳозланган MacBook Pro ноутбукларини намойиш этди. Бу ҳақда “Reuters” хабар берди.

Компания раҳбари Жон Тернус кеча, 28 октябрь куни Лос-Анжелесда бўлиб ўтган тадбирда янги ноутбукларни тақдим этган. Қурилмалар OLED дисплей билан жиҳозланган бўлиб, экран тасвирнинг тиниқлиги, ёрқинлиги ва контрастини таъминлайди. Шунингдек, Apple ноутбукларнинг орқа қисмида ёришиб турадиган логотипни қайтаришини маълум қилган.

Apple раҳбарлари аввалроқ MacBook’ларда сенсорли экран бўлиш ғоясига қарши чиққан. Компания асосчиси Стив Жобс 2010 йилда бундай экранларни ноутбукларда ишлатиш эргономик жиҳатдан ноқулай эканини айтган. Бироқ сенсорли экранлар Windows операцион тизимида ишлайдиган ноутбукларда ўн йилдан ортиқ вақтдан бери қўлланиб келинмоқда.

Янги MacBook Pro сенсорли бошқарув орқали фойдаланувчиларга экран билан бевосита ишлаш имконини беради. Бу, айниқса, контент яратувчилар, дизайнерлар ва фотографлар учун қулай бўлиши кутилмоқда.

14 дюймли, M5 Pro чипи билан жиҳозланган моделнинг бошланғич нархи 2 899 долларни ташкил этади. M5 Max чипли 16 дюймли модель эса 4 799 доллардан сотувга чиқарилади.

Янги ноутбукларга буюртмалар 28 октябрдан қабул қилина бошлаган. Қурилмалар савдоси 6 ноябрь куни бошланиши режалаштирилган.

Apple OLED экранларда учраши мумкин бўлган тасвир изларининг доимий сақланиб қолиши муаммосини камайтириш учун қурилма корпусини ҳам қайта ишлаб чиққан. Янги тизим иссиқ ҳавони дисплейдан узоқроққа йўналтиришга хизмат қилади. Шунингдек, M5 чипларининг ҳисоблаш имкониятларидан экран тасвирини янгилаб туришда фойдаланилади.

'2025 йилда дунё бўйлаб 33,4 миллион дона сенсорли экранли ноутбук етказиб берилган. Бу бир йил аввалгига нисбатан 22 фоизга кўп. Бундай қурилмалар жами ноутбуклар етказиб берилишининг 16 фоизини ташкил этган. Уларнинг ўртача сотув нархи эса 1 009 доллар атрофида бўлган.

Apple янги қурилмалари билан сенсорли ноутбуклар бозорида Lenovo, HP ва Dell каби рақобатчиларга қарши туриши керак. Ушбу компаниялар сенсорли экранли ноутбукларни Apple’нинг янги моделларига нисбатан арзонроқ нархларда таклиф қилмоқда.

Таҳлилларга кўра, янги MacBook Pro, айниқса, юқори сифатли экран ва сенсорли бошқарувдан фойдаланадиган ижодкорлар учун мўлжалланган. Бироқ қурилмаларнинг юқори нархи уларнинг кенг омма орасида қанчалик оммалашишига таъсир қилиши мумкин.