Андижонда маҳбуслар мажбуран ишлатилган ҳибсхона раҳбари ишдан олинди

Андижон вилоятининг Избоскан туманида маҳбуслари мажбурий меҳнатга жалб қилинган Вақтинча сақлаш ҳибсхонаси раҳбари лавозимидан озод этилди. Бу ҳақда Олий Мажлиснинг Инсон ҳуқуқлари бўйича вакили (Омбудсман) хабар берди.

Қайд этилишича, жорий йилнинг март ойида Омбудсманнинг Андижон вилоятидаги минтақавий вакили Избоскан тумани ИИБ Вақтинча сақлаш ҳибсхонасидаги шароитларни ўрганиб, қатор камчиликларни аниқлаган. Жумладан, ҳибсхонада санитария-гигиена ва моддий-техник таъминотга оид жиддий камчиликлар аниқланган. Шунингдек, канализация тизими билан боғлиқ муаммолар борлиги ва айрим маҳбусларни мажбурий меҳнатга жалб қилиш ҳолатлари қайд этилган.

Омбудсман Андижон вилояти Ички ишлар бошқармасидан камчиликларни бартараф этишни ва шу каби ҳолатлар такрорланмаслиги учун тегишли чоралар кўрилишини сўраган.

Маълум қилинишича, мониторинг якунларига кўра 6 нафар ходимга нисбатан хизмат текшируви тайинланган ва уларга интизомий чоралар қўлланилган. Жумладан, 1 нафар ходим Интизомий кенгаш муҳокамасига қўйилган, 2 нафар ходимга танбеҳ, 2 нафарига эса ҳайфсан интизомий жазолари берилган. Вақтинча сақлаш ҳибсхонаси раҳбари эса Ички ишлар органларидан бўшатилган.

Билдирилишича, ҳозирда аниқланган камчиликларни бартараф этиш бўйича ишлар бошланган бўлиб, уларнинг тўлиқ ҳал этилиши бўйича Омбудсман доимий назорат олиб боради.

Эслатиб ўтамиз, жорий йилнинг февраль ойида Тошкент вилоятидаги 7-сонли жазони ижро этиш колониясидан ва ИИВ Жазони ижро этиш департаментининг Олмалиқдаги 14-сонли колониясидан маҳкумларнинг жасади чиққан эди.