АҚШда вертолёт парвоздан сўнг дарҳол қулаб тушди. Қурбонлар бор (видео)

Кеча, 30 сентябрь куни бортида беш киши бўлган тиббий авиация хизмати вертолёти АҚШда сувга қулади. Икки киши ҳалок бўлди, яна бир киши бедарак йўқолган деб ҳисобланмоқда. Бу ҳақда NBC4 телеканали хабар берди.

Қайд этилишича, вертолёт Санта-Каталина оролидан ҳавога кўтарилганидан кўп ўтмай сувга қулаган. Бортда беш киши бўлган.

“Тўрт киши сувдан олиб чиқилди ва шифохонага етказилди. Улардан икки нафари ҳалок бўлди, яна икки нафарининг аҳволи барқарор. Оролдан материкка олиб ўтилаётган бемор ҳозирча топилгани йўқ”, дейилади хабарда.

Ҳалокат Пеббли-Бич яқинида, Авалон шаҳридан тахминан бир ярим километр узоқликда, соат 19:50 ларда содир бўлган. Қулаш сабаблари ҳозирча номаълум.

“Ҳозирда ҳодиса жойида об-ҳаво яхши, шунинг учун мен буни қидирув ишлари учун идеал деб айтган бўлардим. Бироқ ҳалокатдан сўнг сувда жуда кўп парчалар тўпланган. Бундан ташқари, сувга вертолётнинг муайян миқдордаги ёнилғиси тўкилган”, дейди АҚШ Соҳил муҳофазаси командири Марк Лихи.

Эслатиб ўтамиз, аввалроқ Канаданинг Квебек провинциясида вертолёт ҳалокатга учраши оқибатида бортдаги тўрт киши ҳалок бўлган эди.