АҚШ Запорожье АЭС яқинидаги ҳудудларни назоратга олишни таклиф қилди 

АҚШ Украинадаги сулҳ доирасида Запорожье атом электр станцияси атрофидаги ҳудудларга нейтрал мақом беришни ва уларни Вашингтон назоратига ўтказишни таклиф қилмоқда. Бу ҳақда кеча, 20  апрель куни “The Wall Street Journal” (WSJ) хабар берди.

Мақолада ушбу назорат қандай амалга оширилиши ва бу ҳолатда Россия томонидан босиб олинган Запорожье АЭСни ким бошқариши кераклиги ҳақида аниқ маълумот берилмаган.

WSJ маълумотларига кўра, Украинада ўт очишни тўхтатиш режасини ишлаб чиқиш доирасида Запорожье АЭС бўйича таклиф 17 апрель куни Парижда Америка ва Украина делегациялари ўртасидаги музокараларда Киевга топширилган. Киев бу саволга эҳтимол АҚШ, Украина ва Европа вакилларининг Лондонда бўлиб ўтадиган учрашувида жавоб беради.

Қайд этиш жоиз, 19 март куни Президентлар Владимир Зеленский ва Дональд Трамп ўртасида бўлиб ўтган телефон мулоқоти чоғида Украина атом электр станциялари ва уларни Қўшма Штатлар томонидан бошқарилиши мумкинлиги масаласи кўтарилган эди. Ўшанда Украина раҳбари муҳокама фақат россияликлар томонидан босиб олинган Запорожье атом электр станцияси ҳақида кетаётганини таъкидлаган эди. Бироқ Америка томони суҳбатни бошқача талқин қилди.

“Ушбу станцияларга Америка эгалик қилиши ушбу инфратузилма учун энг яхши ҳимоя ва Украина энергетика инфратузилмасини қўллаб-қувватлаш бўлади”, дейилади АҚШ Давлат котиби Марко Рубио ва Президентнинг миллий хавфсизлик бўйича маслаҳатчиси Майк Уолтцнинг қўшма баёнотида.

Кейинроқ “Reuters” агентлиги Дональд Трамп Россия Президенти Владимир Путин билан Запорожье АЭС устидан назоратни муҳокама қилмоқчи бўлганини маълум қилди. Ўшанда Россия ТИВ дунёда атом электр станцияларидан биргаликда фойдаланишга оид мисоллар йўқлигини таъкидлаб, объектни Украина ёки бошқа давлатга ўтказишни истисно қилди.