АҚШ Украинага Донецк ва Луганск чегараларини ўзгартиришни таклиф қилди – ОАВ

Америкалик музокарачилар сўнгги вақтларда Россия ва Украина ўртасидаги ҳудудлар бўйича келишув доирасида Донецк ва Луганск вилоятларининг чегараларини ўзгартириш ғоясини билдирмоқда. Бу ҳақда ўз манбаларига таяниб, “The Economist” хабар берди.

Нашр суҳбатдошларининг сўзларига кўра, бундай ўзгаришнинг ғояси шундаки, Россия ушбу минтақаларни тўлиқ эгаллаганини эълон қилиши мумкин бўлади, Украина эса бунда ўз ҳудудларини бериб қўйишига тўғри келмайди.

“The Economist” манбалари, шунингдек, музокаралар давомида Россиянинг “ғайриоддий эгилувчанлиги” ҳақида маълум қилган. Бироқ уларнинг қайд этишича, бу эгилувчанлик Европа хавфсизлигини муҳокама қилиш таклифидан сўнг пайдо бўлган. Эндиликда АҚШ Москва бундай муҳокамаларни баҳона қилиб, ҳарбий ҳаракатларни чўзишидан хавотирда.

Эслатиб ўтамиз, АҚШ Президенти Дональд Трамп жорий йилнинг 9 ноябрь куни уруш якунланганидан сўнг Украина “бироз бошқача шаклни қабул қилишини” эълон қилган эди.

Россия аннексия қилинган Қрим, шунингдек, Донецк, Луганск, Запорожье ва Херсон вилоятлари, шу жумладан ўзи назорат қилмайдиган туманлар устидан ўз назоратини халқаро даражада тан олинишини таъкидламоқда.