АҚШ Туркиядан Россияга маҳсулот экспорт қилишни тўхтатишни талаб қилди – “Bloomberg”

Америка Қўшма Штатлари Туркиядан Россияга товарлар экспортини тўхтатишни талаб қилди. Бу ҳақда “Bloomberg” манбаларига таяниб хабар берди.

Қайд этилишича, АҚШ Молия вазирининг ўринбосари Брайан Нельсон Туркия расмийлари билан музокаралар ўтказган. У музокараларда Туркия орқали Россияга санкция қўйилган ўн миллионлаб долларлик товарлар келгани ва уларнинг бир қисми Россия Мудофаа вазирлиги манфаати йўлида ишлатилиши мумкинлиги ҳақида гапириб ўтган.

“2022 йилнинг мартидан октябригача ўнлаб туркиялик экспортчилар Россияга 800 миллион долларга яқин маҳсулот жўнатган”, дейилади хабарда.

Нашрга кўра, келаси ҳафталарда АҚШ ва Европа расмийлари бу мавзуни муҳокама қилиш учун Туркияга яна ташриф буюриш ниятида.

“Bloomberg”нинг эслатишича, Нельсон Туркияга кўп ташриф буюрган ва АҚШ санкцияларига риоя қилиш учун Анқарага босимни кучайтирган мамлакат Молия вазирлигининг учинчи юқори мартабали мулозимидир.