5-қаватдан йиқилган 4 яшар қизни қўшнилари ёпинчиқ билан тутиб қолди (видео)

Польшанинг Ломжа шаҳрида уч нафар қўшни 5-қаватдаги балкондан йиқилган 4 ёшли қизни ёпинчиқ ёрдамида ушлаб, унинг ҳаётини сақлаб қолди. Бу ҳақда “TVP World” хабар берди.

Қайд этилишича, воқеа жорий йилнинг 9 август куни тушдан кейин содир бўлган. Қўшнилар бинонинг 5-қаватидаги балкон четида осилиб турган қизни кўриб қолган.

Қутқарув хизматлари етиб келгунига қадар 3 нафар эркак ёрдамга шошилган. Улар қиз тушиши мумкин бўлган жойга ёпинчиқни ёйиб, уни йиқилган вақтида ушлаб қолган.

Воқеа кузатув камераларига ҳам тушган. Маҳаллий полиция вакили Каролина Войтсекияннинг сўзларига кўра, қўшниларнинг тезкор ҳаракати туфайли фожианинг олди олинган.

Қутқарувда иштирок этган қўшнилардан бири Дариуш Плонски воқеа бир неча сония ичида содир бўлганини айтган.

“Бу бир неча сония масаласи эди. Бола бошқа томонга ўтганини кўрганимизда,ёпинчиқни ёйиб, уни ушлаб қолишга зўрға улгурдик”, дея унинг сўзларини келтирган “Radio Bialystok”.

Қиз шифохонага олиб борилган. Шифокорлар унинг танасида енгил кўкаришларни аниқлаган. Ҳозирда унинг ҳолати барқарор экани айтилмоқда.

Полиция маълумотларига кўра, воқеа вақтида қизнинг онаси ухлаётган бўлган, отаси эса чет элда ишлаш учун кетган. Кейинчалик аёлнинг қонида 0,7 промилле миқдорида алкогол аниқланган.

Ҳозирда ҳолат юзасидан тергов давом этмоқда. Агар она болани ўлим ёки оғир жароҳат олиш хавфи остида қолдиришда айбдор деб топилса, унга 5 йилгача қамоқ жазоси тайинланиши мумкин.

Эслатиб ўтамиз, аввалроқ Хитойнинг Чжэцзян провинциясида 20 ёшли қиз севгилиси билан жанжаллашгандан сўнг 18-қаватдаги хонадон балконидан сакраб, омон қолгани ҳақида хабар берилган эди.