Тошкентда “Дерсу” лақаби билан танилган безори қўлга олинди (видео)

Тошкентда ака-укаларнинг коттеж савдоси билан боғлиқ товламачилигига чек қўйилди. Бу ҳақда Давлат хавфсизлик хизмати хабар берди.

Қайд этилишича, Тошкент шаҳрида яшовчи, 1979 йилда туғилган, муқаддам судланган шахс ҳамда унинг 1988 йилда туғилган укаси ўзаро тил бириктириб, маҳаллий фуқаро томонидан Тошкент туманида қурилган коттеж уйни 66 000 АҚШ долларига сотиб олишга келишган.

Дастлаб улар уй эгасига 30 000 АҚШ доллари бериб, қолган 36 000 АҚШ долларни 6 ой муддат ичида беришларини айтган ҳамда 2022 йилнинг май ойида коттежни 1976 йилда туғилган ўз акаси номига нотариал тартибда расмийлаштириб олган. Бироқ, кейинчалик ака-ука қолган 36 000 АҚШ долларни бермасликларини айтиб, агарда пулни сўраса, фуқарога нисбатан тазйиқ ўтказиш билан қўрқитган.

Шундан сўнг, ДХХ Тошкент шаҳар бўйича бошқармаси ва пойтахт ИИББ ходимлари томонидан ака-ука қўлга олиниб, уларга нисбатан Жиноят кодексининг 165-моддаси (товламачилик) 3-қисми “а” банди билан жиноят иши қўзғатилган.

Билдирилишича, ҳозирда уларга нисбатан тергов ҳаракатлари олиб борилмоқда.

QALAMPIR.UZ'га етиб келган маълумотларга кўра, қўлга олинган шахс Тошкентда "Дерсу" лақаби билан танилган кўча безориси ва унинг укаси. 

Эслатиб ўтамиз, аввалроқ Андижонда ўзини юқори лавозимдаги шахсларга ҳамда Президент оиласига “яқинлиги”ни даъво қилган ва йирик миқдордаги фирибгарлик, товламачилик ва пора беришга далолат қилишда айбланган уюшган жиноий гуруҳ аъзоларига нисбатан суд ҳукми чиқарилганди.