$3000 эвазига жиноятни яширишга уринган ИИБ ходимлари 6 йилга “кесилди”

Жорий йилнинг февраль ойида Чирчиқ шаҳрида содир бўлган жанжалда жабрланувчини алдаб, ишни яширишга уринган 2 нафар ички ишлар органи ходими 6 йилга қамалди. QALAMPIR.UZ суд ҳужжати билан танишди.

Ҳужжатда келтирилишича, жанжал жорий йилнинг 17 февраль куни Чирчиқ шаҳридаги “Бек” номли кафеда бошланган. Жабрланувчи Ш.М. таниши билан бирга у ерга овқатланиш учун борган. Ўша пайтда маст аёл киши жанжал кўтарган. Ш.М. эса ўртага тушиб, аёлларни ажратиб қўймоқчи бўлган. Маст аёл эса вазиятга аралашмасликни айтиб, воқеа жойидан кетган. Кўп ўтмасдан эса аёл Ш.М. ва бошқаларни суратга олиб, ўғли Умид билан “Ислом бухарский” келишини айтган ва кафедан чиқиб кетган. Орадан 20 дақиқалар ўтгандан кейин эса бир неча киши кафега кириб, Ш.М. ни ташқарида “Ислом бухарский” кутаётганини айтган. Ш.М. эса унинг олдига борган. Ш.М. нинг айтишича, “Ислом бухарский” билан бирга тахминан 10 нафар йигит келган. Шунингдек, ўша ерда ИИБ ППХ ходимлари ҳам бўлган. Шунда “Ислом бухарский” Ш.М. ни кўриб қайтиб кетишини айтган, бироқ йигитлардан бири унинг қўлидан тортган ва кутилмаганда Умид жағидан урган. Оқибатда Ш.М. ерга йиқилган ва йигитлар уни яна турғизган. Кейин у кафега кириб, қонаган жойларини ювган. Бироздан кейин ташқарига чиқиб ҳамма кетганини кўрган ва такси тўхтатиш учун йўл четига турган. Шунда Ислом деган шахс Gentra’да келиб, Умид ўртоғи бўлишини ва гапи бўлса сўраб олишини айтиб, телефон рақамини берган. Орадан бироз вақт ўтиб, яна 4-5 та йигит келган. Улар Ш.М. ни ўша ердаги Epica’га ўтирғизмоқчи бўлган, бироқ эркак қочиб кетган. 1 километрлардан кейин улар машинада эркакка етиб олган ва “Гера” лақабли шахс мушт билан урган, бошқа йигитлар эса тепган. Шундан сўнг, Ш.М. ўзини йўқотган ва тез ёрдам машинасида шифохонага олиб борилган. Кейинроқ ИИБ ходимлари уни жанжал содир бўлган ҳудуддаги ИИБ биносига олиб кетган.

Ҳужжатда келтирилишича, ушбу ишни пул эвазига яширишга уринган 35 ёшли Н.А. Чирчиқ шаҳар ИИБ ЖХХ ҲПБ бошлиғи, 31 ёшли Д.Р. эса профилактика инспектори лавозимида ишлаган. Ш.М. нинг калтакланиши билан боғлиқ ҳолат профилактика инспектори Д.Р. нинг иш юритувида бўлган. Н.А. ва Д.Р. ҳолатга алоқадор фуқаролар билан гаплашиб, моддий фойда эвазига ишни уларнинг томонига ҳал қилиб беришни мақсад қилган. ИИБ ходимлари калтакланган Ш.М. га фуқаролар У.Б., Қ.С. ва А.Р.га қонуний чора кўриб бўлмаслигини, улар қилган ишлари учун ҳаттоки маъмурий жавобгарликка тортилмаслигини айтган ва даъво қилмаслиги эвазига пул ундириб беришни билдирган. Шундан сўнг, иккинчи томонга Ш.М. соғлиғини тиклаши, берилган аризасини қайтариб олиши ҳамда ишни тугатиб, уларни қайта безовта қилмаслик эвазига 3 минг доллар талаб қилган. Жорий йилнинг 18 февраль куни келишилган пулдан 2 700 долларини олган. Шундан 1 700 долларини ўзаро бўлиб олган ва минг долларини Ш.М. га берган. Шундан сўнг мазкур ҳолат бўйича жиноят ишини қўзғатишни рад этиш тўғрисида қарор қабул қилинган.

Жорий йилнинг 7 октябрь куни Жиноят ишлари бўйича Чирчиқ шаҳар судида мазкур иш кўриб чиқилган. Судда ҳар иккала ИИБ ходимлари айбини тан олмаган. Бироқ далиллар асосида суд уларни айбдор деб топган. Хусусан, Н.А. ва Д.Р. Жиноят кодексининг 210-моддаси (пора олиш) 2-қисми “в” ва “г” бандлари, 230-1 -моддаси (далилларни сохталаштириш (қалбакилаштириш) 2-қисми “а” ва “б” бандлари ҳамда 241-1-моддаси (жиноятни ҳисобга олишдан қасддан яшириш) 2-қисми “б” бандида назарда тутилган жиноятларни содир этганликда айбли деб топилган. Уларга 3 йил ички ишлар тизимида ишлаш ҳуқуқидан маҳрум қилган ҳолда 6 йилдан озодликдан маҳрум қилиш жазоси тайинланган. Жазо умумий тартибли колонияларда ўташ белгиланган.

Шунингдек, “Ислом бухарский” лақабли Ислом Саидов ва яна 5 киши ДХХ ҳамда ИИВ Чирчиқ шаҳрида уюшган жиноятчиликка қарши курашиш йўналишида ўтказган тезкор-қидирув тадбирида қўлга олинган. Уларга нисбатан тергов ҳаракатлари давом этмоқда.

Эслатиб ўтамиз, жорий йилнинг апрель ойида Тошкент вилоятининг Чирчиқ шаҳрида фуқарога етказилган тан жароҳати бўйича ишни “босди-босди” қилмоқчи бўлган юқорида номи келтирилган профилактика инспектори қўлга тушгани ҳақида хабар берилган эди.