200 га яқин калтакесакни пайпоқлар орасига яширган эркак ушланди

Жорий йилнинг 8 август куни Токиодаги Ханеда аэропортида Мексикадан Жанубий Корея орқали келган 23 ёшли эркакнинг юкидан 200 га яқин калтакесак топилди. У судралиб юрувчиларни божхонага декларация қилмасдан Японияга олиб киришга уринган. Бу ҳақда “The Independent” хабар берди.

Қайд этилишича, Даниэль Исаак Веласко Балтасар исмли эркакнинг чамадонидан калтакесаклар 22 жуфт пайпоқ ичига солинган ва футболкаларга ўраб қўйилган ҳолда аниқланган. Ҳайвонлардан бири чамадон очилганида ўлик бўлган. Эркак уларни рухсатсиз олиб кирганини тан олган.

Калтакесакларнинг камида 9 таси фақат Мексиканинг тоғли ўрмонларида учрайдиган ва йўқолиб кетиш хавфи остида бўлган Мексика аллигатор калтакесаклари экани аниқланган. Улар халқаро савдоси ҳукумат рухсатини талаб қиладиган ҳайвонлар рўйхатига киритилган.

Маълумотларга кўра, гумондор калтакесакларни Мексикада ҳар бирини тахминан 560-750 иенга сотиб олган. Японияда эса ушбу ҳайвонларнинг нархи 100 минг иенгача етиши мумкин. Шу сабабли полиция уларни сотиш мақсадида олиб кирилган бўлиши мумкинлигини тахмин қилмоқда.

Полицияга июль ойи охирида мексикалик фуқаро калтакесакларни мамлакатга яширинча олиб кириб, судралиб юрувчилар кўргазмасида сотмоқчи экани ҳақида аноним хабар келиб тушган. Шундан сўнг, Ханеда божхона ходимлари огоҳлантирилган ва эркак аэропортга келганида унинг юклари текширилган.

Айни пайтда расмийлар чамадондан топилган бошқа калтакесакларнинг турларини ҳам аниқламоқда. Японияда экзотик судралиб юрувчилар бозори йирик бўлиб, аввал ҳам аэропортларда юклар орасига яширилган тошбақа, илон ва бошқа ҳайвонлар аниқланган.

Эслатиб ўтамиз, аввалроқ Тошкент вилоятидаги “Навоий” чегара божхона постида болалардан фойдаланган ҳолда тилла қуймалари ва йирик миқдордаги нақд валютани мамлакатдан ноқонуний олиб чиқишга уринишлар аниқлангани ҳақида хабар берилган эди.