17 яшар қиз гамбургер таъмли помидор етиштирди

Америкалик 17 ёшли мактаб ўқувчиси Габриэлла Ротберг гамбургер таъмига эга генетик модификацияланган помидор етиштирди. Бу ҳақда “Lifehacker” хабар берди.

Қайд этилишича, Габриэлланинг илм-фанга қизиқиши ота-онаси орқали шаклланган. Унинг отаси биотехнология компаниясида ДНК кетма-кетлигини ўрганиш билан шуғулланади, онаси эса саратон касаллигини тадқиқ қилади. Қиз ноодатий помидор етиштириш ғоясини 15 ёшида, ошхонада сендвич тайёрлаётган пайтида ўйлаб топган.

У Майами университети мураббийи Мэддисон Маршалл билан биргаликда ўсимликларга гем ишлаб чиқариш учун зарур генетик материални киритган. Гем — таркибида темир бўлган молекула бўлиб, гўштга хос таъм ва ранг шаклланишида муҳим рол ўйнайди. ДНКни ўсимликка ўтказиш учун Agrobacterium бактериясидан фойдаланилган.

Дастлабки бир неча ой давомида тажрибалар натижа бермаган. Бунга витаминлар концентрациясидаги хато сабаб бўлган. Озиқлантирувчи муҳит тўғрилангaч, помидорлар тез ўса бошлаган ва мақсадига етган.

Эслатиб ўтамиз, аввалроқ Қозоғистонлик олимлар юқори ҳосилдор ва касалликларга чидамли янги картошка навини яратгани ҳақида хабар берилган эди.