Бир товуш – турли ҳис ёхуд “Биринчи қўнғироқ” чалинди

Аниқ биламан, сиз ҳам бундан 5–10, балки 20 йил аввал жуссангиздан бироз катта, ўша пайтда сиз учун оғир лекин қадрли бўлган илк сумкангизни кўтариб, илк бор форма кийиб, 1-синфни ҳаяжон билан бошлагансиз. Ўша пайтдаги ҳислар, умрингизнинг энг унутилмас хотиралари бошланган кунга Янги йўл туманидаги 1-сонли умумий ўрта таълим мактаби мисолида бугун бирга қайтамиз.

Бир неча йиллик боғча таълимини ортда қолдирган бошланғич синф ўқувчилари илк бор мактаб остонасига қадам қўйди. Митти қўлларнинг бири ота-оналарнинг қўлидан маҳкам тутган бўлса, иккинчисида биринчи устозлари учун аталган гуллар бор. Эрта тонгдан 2019 йилда туғилган фарзандини мактабга олиб келаётган ота-оналар 1-синф ўқувчиларидан кўпроқ ҳаяжонда. Буни уларнинг кўзларидан, ҳаракатларидан ва сўзларидан билиш қийин эмас.

“Кечқурун ухлай олмадим, кечадан ҳаяжон босди. Фарзандим бир пастда улғайиб қолгандек. Эрталабдан бери йиғлаяпман. Болам биринчи синфга чиқди, Худога шукур. Яхши ўқиб, Ватанимизга, оиламизга фойдали, манфаатли инсон бўлиб етишсин. Вақт жуда тез ўтиб кетди, бугун шуни ҳис қилдим”, дейди ўғлини биринчи синфга олиб келган оналардан бири.

Яна бир она эса ўз ҳиссиётларини қуйидагича ифодалади:

“Жуда ҳаяжонландим. Аввал қизим ҳам мактабга чиққанди, лекин бугун барибир ҳаяжон босди. Энди биринчи синфга чиқариб олдик, буёғига эплаб кетади деган умиддаман, яхши-яхши баҳоларга ўқишсин. Фарзандим тез катта бўлди. Қандай катта бўлиб қолганини билмай қолдим. Ҳали ҳам ишонмаяпман ўғлимнинг биринчи синфга чиққанига”.

“Биринчи қўнғироқ” тадбирига нафақат ота-оналари билан, балки бувиси билан келганлар ҳам бор. Набирасини мактабга олиб келган бувижон шундай фикр билдирди:

“Биринчи марта набирамни мактабга олиб келганим учун ҳаяжонландим. Бу ҳис бошқача экан. Ёшлигимни эсладим. У пайтда мактаблар кичкина бўлар эди, ҳозир болалар кўп экан. Ҳар бир бувижон  ҳаяжонланади набираси мактабга чиққанда”.

“Жуда ҳам ҳаяжон кучли. Мана ҳозир ҳам, билинаётгандир. Жуда кучли ҳаяжондаман. Боғчадан кейин мактабга бердик. Ҳаётининг иккинчи босқичига қадам ташлади”, дейди илк фарзандини биринчи синфга олиб келган она.

“Биринчи қўнғироқ” тадбири одатдагидек давлатимиз мадҳияси билан бошланди. Юқори синф ўқувчилари 1-сонли мактабга ҳаяжон ва катта иштиёқ билан келган болалар ҳамда йиғилганлар учун тайёрлаган чиқишларини намойиш қилди. Сўнгра, барча кутган “биринчи қўнғироқ” анъанавий тарзда чалинди. Бу овоз кимдир учун биринчи марта янграётган бўлса, яна кимдир “Билимлар кунини” сўнгги бор нишонлаяпти.

“Озроқ ҳаяжонландим, ўн биринчи синф бўлдик. Вақт тез ўтиб кетди. Кўз очиб юмгунча мактабни битиряпмиз”, дейди ўқувчилардан бири.

Битирувчилардан яна бири эса бугунги кун ҳақида шундай фикрда:

“Жуда хурсанд бўляпман, бир тарафдан хафаман. Мактабни битирамиз, ҳиссиётларимни тасвирлаб бера олмайман. Бугун биринчи синфга чиққанимни эсладим, тўғриси”.

“Бу бизнинг охирги “Биринчи қўнғироғимиз”. 11-синфмиз. Кейинги йил катта ҳаётга қадам қўямиз, ўқишга кирамиз. Бугунги кун зўр бўлди. Олдимда биринчи синфлар турди. Булар ҳам биздек 11 йилдан кейин шу вазиятни бошидан ўтказади. Бугунги тадбирда ўзим 1-синфга келган кунни эсладим, кўзим ёшланди”, дейди битирувчилардан бири.

Ҳаммага ёшлигини эслатаётган болажонлар эса “Президент совғасини” олган кунни шундай таърифлашди.

“Эрталаб барвақт туриб, яхши кайфиятда, чиройли кийиниб, гулларни олиб, ойим билан хурсанд бўлиб мактабга келдим. Аъло баҳога ўқимоқчиман. “Президент совғаси” жуда ёқди”, дейди 1-синф ўқувчиси.

Яна бир ўқувчи эса мактабга келган илк куни ҳақида шундай фикрда:

“Бугун мен биринчи марта мактабга чиқдим. Президент совғасини олдим, жуда ҳам зўр бўлди. Эрталаб чиройли кийимларимни кийиб, ойижоним билан келиб, устозим билан кўришдим. мактаб менга ёқди”.

“Мактаб менга ёқди. Бу ерга келишга жуда қизиқдим. Шунинг учун эрталабдан турдим, ҳаяжонландим. Ойим сочларимни чиройли қилиб турмаклаб қўйди, кейин мактабга олиб келдилар”, дейди қизалоқ.

Ҳар йили мактаб бағрига 11 йиллик саргузаштнинг илк қисмини бошлаган ўқувчилар қабул қилинади, лекин ўқитувчилар учун бу кун муҳимлик даражасини йўқотмайди.

“Касбим педагог бўлганлиги учун, ҳар йили болаларни қабул қилиш жараёнида бевосита иштирокчи ва гувоҳга айланаман. Бизнинг болалигимизга келадиган бўлсак, у пайтлар ҳам ёмон ўтган дея олмайман. Лекин Янги Ўзбекистоннинг болалари ўша бизнинг давримиздан кўра, бошқачароқ ҳурмат, иззат, эҳтиром билан мактабга қабул қилинади. Улар учун махсус “Президент совғалари”нинг тайёрлаб қўйилиши, уларни топшираётгандаги ҳаяжон, ҳаттоки болаларга совғаларини тақдим этаётганда ўзимизнинг қалбимиз ўзгача сурурга тўлади. Болалар ўша совғани олганида шодланганини, кўзлари қанчалар қувончга, нурга тўлганини кўриб, биз устозлар улардан-да кўпроқ, улардан икки баравар, уч баравар кўп хурсанд бўламиз”, дейди мактабнинг тарих ва ҳуқуқ фанлари ўқитувчиси.

2026–2027 ўқув йилида ушбу таълим муассасаси 161 нафар биринчи синф ўқувчиларини қабул қилди. Улар орасида 2 нафар имконияти чекланган болалар ҳам мавжуд бўлиб, бу ташаббус ота-оналар томонидан илгари сурилган.

Республика бўйлаб ўн икки турдаги ўқув қуролларидан иборат “Президент совғаси” топширилган болалар сони эса 795 мингдан ошди.

Жасмина Муртазоева