Ҳормуз бўғозида бир кечада 7 та нефть танкери шикастланди

Ҳормуз бўғозида бир кечанинг ўзида еттита нефть танкери ҳужумга учради ёки денгиз миналарига дуч келиши оқибатида шикастланди. Агар бу маълумот тасдиқланса, Эрон уруши бошланганидан бери бўғозда бир кунда шунча кема зарар кўрган биринчи ҳолат бўлиши мумкин. Бу ҳақда Эрон давлат телеканалига таяниб, “Associated Press” хабар берди.

Маълумотларга кўра, жорий йилнинг 21 октябрдан 22 октябрь тонгигача тўртта танкерга ҳужум қилинган ва уларда ёнғин чиққан. Яна учта кема денгиз миналарига дуч келиб, ҳаракатсиз қолган.

Ҳозирча танкерлар қайси давлат байроғи остида ҳаракатлангани ва ҳодисалар оқибатида жабрланганлар бор-йўқлиги ҳақида маълумот берилмаган. Шунингдек, Эрон томони тарқатган хабарлар мустақил равишда тасдиқланмаган.

“Lloyd’s List Intelligence” кемачилик маълумотлари ва таҳлил компанияси маълумотига кўра, таваккал қилиб Ҳормуз бўғози орқали ҳаракатланаётган танкер операторлари нефть ташиш учун асосан тунги вақтни танламоқда. Улар АҚШ ҳарбийлари ҳимоясидаги, Уммон қирғоқларига яқин йўналишдан фойдаланиб, кемаларнинг жойлашувини кўрсатувчи тизимлар ва мобиль телефонларни ўчириб қўймоқда.

Шундан сўнг, нефть Уммон кўрфазида кутиб турган бошқа танкерларга ўтказилиб, Осиёдаги харидорларга етказилмоқда.

Маълумот учун, АҚШ ва Исроил жорий йилнинг 28 февралида Эронга қарши қўшма зарбалар берганидан кейин минтақада уруш бошланган. Ҳормуз бўғози эса жаҳон нефть таъминоти учун муҳим денгиз йўлларидан бири ҳисобланади.

Саудия Арабистонининг Aramco нефть компанияси раҳбари Амин Носир Ҳормуз бўғозини четлаб ўтувчи қувур орқали ташилаётган нефть ҳажми уч баравардан кўпроқ ошганини маълум қилди. Унинг “Al Arabiya Business” телеканалига айтишича, мамлакатнинг шарқидан ғарбига қараб ўтувчи қувурнинг кунлик ўтказиш қуввати 2 миллион баррелдан 7 миллион баррелгача оширилган.

1980 йиллар бошида қурилган ушбу қувур Эрон уруши сабабли Ҳормуз бўғози орқали нефть ташишда юзага келган узилишлар шароитида Саудия Арабистонининг нефть экспортини давом эттиришида муҳим аҳамият касб этмоқда.

Носир, шунингдек, Яман ҳусийлари нефть конларига берган зарбалар оқибатида етказилган зарарни баҳолаш ва ёнғинларни ўчириш ишларига ёрдам бериш учун компания дронлардан фойдаланганини айтган.

Эслатиб ўтамиз, аввалроқ Ҳормуз бўғози яқинида снаряд ҳужумига учраган иккита кема чўкиб кетгани ҳақида хабар берилган эди.