Joze Mourinyu sobiq shogirdi bilan birga ishlashni xohlayapti

Portugaliyalik mutaxassis Joze Mourinyu “Roma”da bosh muarabbiy bo‘lganidan buyon, uning ishlari ha deganda, oldinga siljimayapti. Rimliklar Italiya A Seriyasida 25 ta uchrashuvda bor yog‘i 40 ochko to‘plagan holda, turnir jadvalida 7-o‘rinda bormoqda. Ushbu pog‘ona bilan “bo‘rilar” Yevropa Ligasidan ham quruq qoladi. 

Bu ham yetmagandek, rimliklar Italiya kubogining chorak finalida “Inter”ga mag‘lub bo‘lib, musobaqani tark etdi. Joze qanchalik harakat qilmasin, “bo‘rilar” shu mavsumdayoq top klubga aylanmaydigan ko‘rinadi. Aksincha, Mourinyuning o‘ziga nisbatan tanqidlar yanada ko‘paymoqda. Shunga qaramasdan, “Roma” rahbariyati portugaliyalik murabbiyga to‘liq ishonmoqda.

Joze “bo‘rilar”ning top jamoaga aylanishini xohlaydi. Biroq hozirda klubda o‘zini jamoani qutqarishga qodir, dunyo darajasidagi o‘yinchiman deb hisoblaydigan futbolchi yo‘q. Albatta, Mourinyu tushunadi-ki, unga aynan shunday futbolchi kerak. "The Sun" nashrining xabar berishicha, Joze Mourinyu  “Manchester Yunayted”dan ketishi haqida xabarlar tarqalayotgan, Krishtianu Ronalduni “Roma”ga taklif qilmoqchi. Joze va Ronaldu ikkisi ham portugaliyalik shuningdek, ular “Real Madrid”da birgalikda ishlagan. Biroq Mourinyu “Real”da bosh murabbiy bo‘lgan vaqtida, Kirishtianu bilan juda ham iliq munosabatda bo‘lmagan. Qolaversa, Ronalduning o‘ziga ham “Roma”ga o‘tish unchalik ma’qul kelmasligi mumkin.

Ma’lumot uchun, Ronaldu  “Manchester Yunayted” APLda Yevropa Chempionlar ligasiga yo‘llanma beruvchi o‘ringa ko‘tarilmasa, klubdan ketishi mumkin. “Roma”dan tashqari, uning xizmatlariga “Bavariya” va PSJ qiziqish bildirmoqda.

Ma’ruf Abdumalikov