JCH-2026: Bugun O‘zbekiston Shimoliy Koreya bilan hisob-kitob qiladi

Bugun, 19 noyabr kuni futbol bo‘yicha Jahon chempionati saralashning 3-bosqich 6-turi doirasida O‘zbekiston milliy terma jamoasi Koreya Xalq Demokratik Respublikasi (KXDR) bilan bahs olib boradi.

Jamoalar shu vaqtga qadar o‘zaro 10 marta to‘qnash kelgan bo‘lib, bahslardan 7 tasida O‘zbekiston, 1 tasida Shimoliy Koreya g‘alaba qozongan. Yana 2 ta o‘yinda durang qayd etilgan. To‘plar nisbati 17-7 O‘zbekiston foydasiga.

Jamoalar oxirgi marta shu yilning 5 sentyabrida Toshkentda to‘qnash kelgan va o‘sha uchrashuvda 1:0 hisobida mezbonlar g‘alaba qozongan. Hozirga vaqtda O‘zbekiston “A” guruhida 10 ochko bilan 2-o‘rinni band etib turgan bo‘lsa, 2 ochkoga ega bo‘lgan koreyslar oxirgi pog‘onani egallagan.

Ma’lumot uchun, KXDR-O‘zbekiston o‘yini Toshkent vaqti bilan soat 17:00 da boshlanadi. Uchrashuvga Laos poytaxti Ventyan shahridagi “Lao” stadioni mezbonlik qiladi.