Yevropa gazsiz qolishi mumkin. “Gazprom” fors-major haqida ogohlantirdi

“Gazprom” Yevropa kompaniyalariga fors-major holatlari tufayli Yevropaga gaz yetkazib berishni kafolatlay olmasligi haqida bildirishnoma yubordi. Bu haqda “Reuters” va “Bloomberg” agentligi maktubga asoslanib xabar berdi.

“Reuters” manbasining aytishicha, bu xabar “Shimoliy oqim 1” gaz quvuri orqali gaz yetkazib berish bilan bog‘liq.

“Gazprom” maktubi 14 iyul kuni yuborilgan va 14 iyundan boshlangan gaz ta’minotiga taalluqli. Unda fors-major holatlarining tugash sanasi ko‘rsatilmagan. Maktubni olgan kompaniyalar orasida Germaniyaga Rossiya gazining eng yirik importchisi bo‘lgan Germaniyaning Uniper konserni ham bor edi. Uniper fors-major holatlari da’vosini asossiz deb hisoblashini ta’kidlagan.

Energy Aspects konsalting kompaniyasi vakili Trevor Sikorskiy “Bloomberg” agentligiga retroaktiv fors-major holatlari e’lon qilinishi "yumshoq qilib aytganda, g‘ayrioddiy" ekanligini urg‘ulagan. Uning fikricha, bu "Gazprom" gaz quvuriga rejalashtirilgan ta’mirlash ishlari yakunlanganidan keyin "Shimoliy oqim 1" orqali gaz yetkazib berishni qayta tiklashni rejalashtirmayotganini ko‘rsatishi mumkin.

“Gazprom” may oyidan boshlab Yevropaga gaz yetkazib berishni qisqartirishni boshladi. Iyun oyi o‘rtalarida kompaniya “Shimoliy oqim 1” gaz quvuri orqali gaz tashish hajmini (bu Ukrainada urush boshlanganidan keyin Rossiya gazini Yevropaga yetkazib berishning asosiy yo‘nalishi) nominal quvvatning 40 foizigacha qisqartirilganini e’lon qildi.

“Gazprom” buni Viborgdagi Portovaya kompressor stansiyasi uchun Siemens turbinasi ta’mirdan qaytishning kechikishi bilan izohladi. Turbina ta’mirlash uchun Kanadaga yuborilgan va urush boshlanganidan keyin sanksiyalar ostida qolgandi. Keyinchalik, Kanada Germaniyaning iltimosiga binoan turbinani Rossiyaga qaytarishga rozi bo‘ldi.

11 iyuldan 21 iyulgacha “Shimoliy oqim” orqali yetkazib berish rejalashtirilgan ta’mirlash ishlari tufayli rasman to‘liq to‘xtatildi. Yevropada “katta”lari Rossiya gaz yetkazib berishni qayta tiklamasligidan va sanksiyalarni bekor qilish uchun gaz shantajiga murojaat qilishi mumkinligidan xavotirda. Moskva gazdan siyosiy bosim uchun foydalanayotganini rad etmoqda.