YeI va NATO nafaqat Rossiya, balki Xitoy tahdidiga ham duch kelayotgani aytildi

Yevropa Ittifoqi va NATO nafaqat Rossiya tahdidiga duch kelmoqda, balki Xitoydan o‘z xavfsizligiga tahdid solinayotganini ham ko‘rmoqda. Bu haqda 10 yanvar kuni Yevrokomissiya rahbari Ursula fon der Lyayen Shimoliy Atlantika alyansi va YeI o‘rtasida hamkorlik to‘g‘risidagi deklaratsiya imzolanganidan keyingi matbuot anjumanida aytib o‘tdi. 

“Yevropaning xavfsizligi so‘roq ostida va tahdid ostida. Rossiya tahdidlari eng to‘g‘ridan-to‘g‘ri, ammo yagona emas. Shuningdek, Xitoy xalqaro tartibni o‘z manfaatlari yo‘lida o‘zgartirishga tobora ko‘proq harakat qilayotganiga guvoh bo‘lmoqdamiz. Biz o‘z barqarorligimizni mustahkamlashimiz kerak va bu yangi qo‘shma deklaratsiya bilan biz ham hamkorlikni keyingi bosqichga olib chiqmoqdamiz”, deydi u. 

NATO Bosh kotibi Yens Stoltenbergning fikricha, Yevropa Ittifoqi va NATO Ukrainaga yordam hajmini oshirishi kerak.

“NATO va Yevropa Ittifoqi Kiyevni qo‘llab-quvvatlash uchun birlashdi. Biz Ukrainaga yordamimizni yanada kuchaytirishimiz kerak”, deydi Stoltenberg. 

“The New York Times” gazetasi xabar qilganidek, NATO davlatlarining uchdan ikki qismi Ukrainaga qurol yetkazib berish imkoniyatlarini tugatgan. Nashr ma’lumotlariga ko‘ra, alyans davlatlari Kiyevga 40 milliard dollarlik qurol-yarog‘ topshirgan, bu Fransiyaning yillik harbiy byudjeti bilan teng.

Eslatib o‘tamiz, 10 yanvar kuni Yevropa Ittifoqi va NATO ikki tashkilot o‘rtasidagi hamkorlik to‘g‘risidagi yangi deklaratsiyani imzoladi va uni Ukrainadagi mojaro fonida “yangi bosqichga” ko‘tardi.

Deklaratsiya matniga ko‘ra, NATO Yevro-Atlantika mintaqasida jamoaviy xavfsizlikning asosi bo‘lib qolmoqda, biroq alyans, shuningdek, NATO bilan mos keladigan va tashkilot imkoniyatlarini to‘ldiradigan faolroq Yevropa mudofaasi qiymatini tan oladi.