YeI Kengashi Rossiyaga qarshi 15-sanksiya paketini ma’qulladi

Yevropa Ittifoqi Tashqi ishlar vazirlari Rossiyaning Ukrainaga qarshi urushi uchun 15-sanksiya paketini ma’qulladi. Bu haqda bugun, 16 dekabr kuni Bryusselda Yevropa Ittifoqining oliy vakili Kaya Kallas ma’lum qildi.

"Rossiya Ukraina va Ukraina xalqiga qarshi noinsoniy hujumlarini davom ettirmoqda. Ushbu sanksiyalar paketi Rossiya harbiy mashinasini va bu urushni amalga oshirayotganlarni, jumladan, Xitoy kompaniyalarini zaiflashtirishga qaratilgan javobimizning bir qismidir", dedi Kallas.

Uning so‘zlariga ko‘ra, yangi sanksiyalar paketining qabul qilinishi Yevropa Ittifoqiga a’zo davlatlarning Ukrainani so‘zsiz qo‘llab-quvvatlashda birligini ko‘rsatadi.

“Bizning bevosita ustuvor vazifamiz Ukrainani eng kuchli pozitsiyaga qo‘yishdir. Biz Ukraina xalqini barcha jabhalarda qo‘llab-quvvatlaymiz: gumanitar, iqtisodiy, siyosiy, diplomatik va harbiy. Ukraina g‘alaba qozonishiga shubha bo‘lishi mumkin emas”, deb ta’kidladi u.

Shuningdek, "qora ro‘yxat"ga Ukraina hududiy yaxlitligi, suvereniteti va mustaqilligiga putur yetkazuvchi yoki tahdid soluvchi harakatlar uchun javobgar bo‘lgan Rossiya, Xitoy va KXDRdan 54 nafar shaxs va 30 ta tashkilot kiritilgan.

Iyul oyi boshida Kiyevdagi "Oxmadet" bolalar shifoxonasiga uyushtirilgan hujum uchun javobgar bo‘lgan Rossiya Qurolli kuchlari bo‘linmasi, energetika sohasidagi yetakchi kompaniyalar rahbarlari, KXDRning ikki yuqori martabali amaldori, shuningdek, ukrainalik bolalarni deportatsiya qilish, targ‘ibot va sanksiyalarni chetlab o‘tish uchun javobgar shaxslarga nisbatan jazo choralari qo‘llanildi. 

Sanksiyalar Rossiya Federatsiyasi tomonidan taqiqlangan neft eksportini amalga oshiradigan soya flotiga qarshi kurashish orqali YeI sanksiyalarini chetlab o‘tish muammosini hal qilishga, shuningdek, Rossiya harbiy-sanoat kompleksini zaiflashtirishga qaratilgan.

Neft xomashyosi va neft mahsulotlarini dengiz orqali tashish va Rossiya hukumatiga muhim daromad keltirish uchun mas’ul bo‘lgan Rossiya mudofaa va yuk tashish kompaniyalariga nisbatan cheklov choralari joriy etildi. Ro‘yxatga uchinchi davlatlarning soya flotiga kiruvchi 52 ta kemasi kiritilgan va shu tariqa Yevropa Ittifoqi sanksiyalari ostidagi kemalarning umumiy soni 79 taga yetkazilgan. Ularga Yevropa Ittifoqi portlariga kirish va Yevropa kompaniyalaridan xizmatlar olish taqiqlangan.

Bundan tashqari, ro‘yxatga kimyo zavodi va Rossiya harbiy xizmatchilarini topshirishda muhim logistika bo‘g‘ini bo‘lgan fuqarolik rus aviakompaniyasi kiritilgan. Birinchi marta Rossiya Federatsiyasiga uchuvchisiz samolyotlar qismlari va mikroelektron komponentlar yetkazib beruvchi bir qator Xitoy kompaniyalariga nisbatan sayohatni taqiqlash, aktivlarni muzlatish va iqtisodiy resurslar bilan ta’minlashni taqiqlash kabi keng ko‘lamli sanksiyalar joriy etilmoqda.

Rossiya harbiy-sanoat kompleksini qo‘llab-quvvatlovchilar ro‘yxatiga 32 ta yangi sub’ekt qo‘shildi, ular eksportga qat’iy cheklovlar qo‘yiladi.

"Ulardan ba’zilari uchinchi mamlakatlarda – Xitoy, Hindiston, Eron, Serbiya va BAAda joylashgan va savdo cheklovlarini chetlab o‘tish bo‘yicha faoliyat bilan shug‘ullanadi", deyiladi bayonotda.

YeI Kengashi, shuningdek, Rossiya Federatsiyasi Arbitraj protsessual kodeksining 248-moddasi asosida Rossiya sudlari tomonidan qabul qilingan qarorlarning Yevropa Ittifoqida tan olinishi va ijro etilishini taqiqladi. Ushbu qarorlar ko‘pincha Yevropa kompaniyalari uchun nomutanosib ravishda yuqori jarimalarga olib kelgan. Ushbu chora jarimalarni Yevropa kompaniyalariga qo‘llashni oldini oladi.

Yevropa Ittifoqi Kengashi veb-saytiga ko‘ra, yangi sanksiyalar tez orada Yevropa Ittifoqining rasmiy jurnalida chop etiladi. Bunga parallel ravishda, Rossiyaning Ukrainaga keng ko‘lamli bostirib kirishi boshlanganining uch yilligiga to‘g‘ri kelishi mumkin bo‘lgan 16-sanksiyalar paketi ustida ish olib borilmoqda. Yevropa Ittifoqining ayrim a’zolari paketni zudlik bilan muhokama qilishni talab qilmoqda.

"Umid qilamizki, u Rossiya tovarlariga kattaroq import tariflarini o‘z ichiga oladi", dedi diplomatik manbalar.