Yangi yil kechasi qaysi hududlarda qor yog‘ishi mumkinligi aytildi

Ertaga, 31 dekabr kuni 7 viloyatda qor yog‘ishi kutilmoqda. Yangi yil kechasida esa faqat Toshkent viloyati va Farg‘ona vodiysi viloyatlarida qor yog‘ishi mumkin. Bu haqda Gilrometeorologiya xizmati markazi xabar berdi. 

Bugun, 30 dekabr kuni Qoraqalpog‘iston Respublikasi, Xorazm viloyatida va kechga tomon Buxoro, Navoiy viloyatlarida ba’zi joylarda biroz yog‘ingarchilik (yomg‘ir, qor) bo‘lishi mumkin, respublikaning qolgan hududlarida yog‘ingarchilik kutilmaydi. Kunduzi havo harorati 4-9 daraja iliqni tashkil etadi. 

Ertaga, 31 dekabr kuni Toshkent, Samarqand, Jizzax, Sirdaryo viloyatlarida va Farg‘ona vodiysi viloyatlarida yog‘ingarchilik (yomg‘ir, qor) bo‘ladi, Buxoro, Navoiy viloyatlarida esa yog‘ingarchilik faqat kechasi bo‘lishi mumkin. Respublikaning qolgan hududlarida yog‘ingarchilik kutilmaydi. Havo harorati kechasi 2 sovuq-3 daraja iliq, kunduzi 2-7 daraja iliq bo‘ladi. 

Yangi yil kechasi faqat Toshkent viloyati va Farg‘ona vodiysi viloyatlarida ba’zi joylarda biroz qor yog‘ishi mumkin. 

1 yanvarda respublika hududining katta qismida yog‘ingarchilik kutilmaydi, faqat kunning ikkinchi yarmida Qoraqalpog‘iston Respublikasida qor yog‘adi. Havo harorati deyarli o‘zgarmaydi. 

Kechasi va ertalab respublika bo‘yicha ba’zi joylarga tuman tushishi kuzatiladi. 

Dam olish kunlari tog‘li hududlarda vaqti-vaqti bilan qor ko‘rinishidagi yog‘ingarchilik bo‘ladi.