Yana “chaqnash”. Bo‘stonliqdagi ko‘p qavatli uyda ham gaz portladi

Toshkent viloyati Bo‘stonliq tumani “Chorvoq” qo‘rg‘onidagi 2 qavatli uyning xonadonlaridan birida bugun, 30 yanvar kuni soat 08:20 larda gaz portladi. Bu haqda Favqulodda vaziyatlar vazirligi xabar berdi. 

Ma’lum bo‘lishicha, yuzaga kelgan kinetik zarba natijasida xonadon devor va shiftiga shikast yetgan.

“Voqea joyiga zudlik bilan tuman FV bo‘limi qutqaruvchilari yetib borgan. Chaqnash oqibatida 4 nafar fuqarolar turli darajada tan jarohati olib,  shifoxonaga yotqizilgan.

Hodisa joyiga viloyat FVB  rahbariyati,  IIB, SSB, prokuratura hamda “Hududgazta’minoti” hodimlari chiqishgan” deyiladi xabarda.

Qayd etilishicha, mazkur holat yuzasidan dastlabki tergov oldi surishtiruv ishlari olib borilmoqda.

Eslatib o‘tamiz, avvalroq  Nukus va Andijondagi ko‘p qavatli uyda gaz portlagani haqida xabar bergan edik. Qoraqalpog‘istonda sodir bo‘lgan portlashda 5 nafar fuqaro vafot etgan.