Valverde hali “Real”dan ketish niyatida emas

“Real” yarim himoyachisi Federiko Valverde faoliyatini Angliyada davom ettirish niyatida emas. Bu haqda futbolchi “Mundo Deportivo”ga bergan intervyusida aytib o‘tdi.

“Menda “Real”da o‘ynash imkoniyati bor. Umid qolmagan taqdirda boshqa yechim izlayman yoki “Real” men uchun chora topadi”, deydi Valverde.

25 yoshli Federiko Valverde 2016 yildan beri “Real”da o‘ynab kelmoqda. Madrid klubi tarkibida urugvaylik yarim himoyachi ikki marta Ispaniya chempioni bo‘ldi, mamlakat kubogi va Yevropa Chempionlar ligasida g‘olib chiqdi. Federiko “Real Madrid” bilan jami 9 ta sovrin yutdi.

17 sentyabr kuni “Real” Ispaniya chempionatining 5-turida o‘z maydonida “Real Sosedad”ni mag‘lub etdi. “Santyago Bernabeu”dagi uchrashuv 2:1 hisobida yakunlandi. Ispaniya ichki chempionatining besh turidan so‘ng, “Real” 15 ochko bilan birinchi o‘rinni egallab turibdi. “Qaymoqranglilar” bu mavsumda La Ligada hali ochko yo‘qotmagan yagona jamoa.