O‘zbekistonga 40 ming doza “Sputnik V” vaksinasi olib kelindi

O‘zbekistonga Rossiyada ishlab chiqarilayotgan “Sputnik V” vaksinasining 40 ming dozalik 1-komponenti olib kelindi. Bu haqda O‘zbekiston Sog‘liqni saqlash vazirligi Matbuot xizmati xabar bermoqda.

“Bugun, 5 iyul kuni tunda O‘zbekistonga Rossiyadan “Sputnik V” vaksinasining navbatdagi 40 ming dozalik 1-komponenti olib kelindi.1 iyun kuni "Sputnik V" vaksinasining navbatdagi 70 ming dozalik 1-komponenti, 10 iyunda 70 ming dozalik 2-komponenti keltirilgan edi”, deyiladi xabarda.

Joriy yilning aprel oyida ushbu vaksinaning 100 ming dozasi keltirilgan edi (uning 50 ming dozasi 1-komponent, 50 ming dozasi 2-komponent). 

Shunday qilib, O‘zbekistondagi “Sputnik V” vaksinasi zaxirasi 280 ming dozaga yetdi. Yaqin kunlarda vaksinaning navbatdagi 40 ming dozalik 2-komponenti olib kelinishi kutilmoqda.

Ma’lumot uchun, hozirda O‘zbekistonda AstraZeneca (CovieShield), “Sputnik V” hamda o‘zbek-xitoy vaksinalaridan foydalanilmoqda.