O‘zbekistonda Tentpegging federatsiyasi tashkil etildi

Milliy gvardiya qo‘mondonligi tashabbusi bilan O‘zbekistonda ot sporti turlaridan biri — Tentpegging sportini rivojlantirish, aholi, yoshlar va harbiy xizmatchilarni ushbu sport turiga keng jalb qilish maqsadida O‘zbekiston Tentpegging federatsiyasi faoliyati yo‘lga qo‘yildi. Bu haqda Milliy gvardiya Matbuot xizmati xabar berdi.

Qayd etilishicha, mazkur federatsiyasining raisi lavozimiga Milliy gvardiya huzuridagi ot sporti bo‘yicha Respublika oliy sport mahorati maktabi direktori N.Ibragimov va federatsiya raisining o‘rinbosari lavozimiga esa Yoshlar o‘rtasida harbiy-vatanparvarlik va sport ishlarini tashkillashtirish boshqarmasi boshlig‘i Q.Azizov saylangan. 

Xabarga ko‘ra, Tentpegging sport turi Osiyo va Yevropa davlatlarida juda ommabop bo‘lib, ayniqsa harbiy xizmatchilarning jismoniy va jangovar tayyorgarligini mustahkamlashda muhim ahamiyat kasb etadi.

Ma’lumot uchun, ushbu musobaqada nayza yoki qilich bilan qurollangan chavandoz ot minib ketayotgan vaqtida yerdagi kichik bir narsani teshib, uni nayzaga ilib olishi kerak bo‘ladi.