O‘zbekistonda emlash majburiy bo‘lish ehtimoli bor...mi? Nurmat Otabekov javob berdi

O‘zbekistonda allaqachon koronavirusga qarshi 4 million 300 ming dozadan ortiq vaksina amalga oshirilgan bo‘lsa-da, ikki va uch bosqichli vaksinani to‘liq olganlar bor-yo‘g‘i 850 ming kishini tashkil etyapti. Hukumat, O‘zbekiston Respublikasiga koronavirusning kirib kelishi va tarqalishining oldini olish bo‘yicha chora-tadbirlar dasturini tayyorlash bo‘yicha respublika maxsus komissiyasi, Sog‘liqni saqlash vazirligi va mutaxassislar mamlakatda koronavirusga qarshi emlanish zarurligi haqida har daqiqada bong urmoqda. Hatto, oxirgi kunlarda emlashni ixtiyoriydan majburiyga o‘tkazish masalasi kun tartibiga chiqqan. Xo‘sh, mamlakatda koronavirusga qarshi emlanish majburiy bo‘lishi mumkinmi? Bu haqda Sanitariya-epidemiologik osoyishtalik va jamoat salomatligi xizmati rahbari o‘rinbosari – Koronavirusga qarshi kurash shtabi a’zosi Nurmat Otabekov QALAMPIR.UZ’ning jonli efir muloqotida so‘z ochdi. 

“Majburiy qilish ehtimoli yo‘q emas. Masalan mendan fikr so‘ralsa, ertagayoq vaksina olishni majburiy qilgan bo‘lardim. Men emlandim. Bu bilan o‘zim va boshqalarning salomatligini himoya qildim. Nega endi boshqalar o‘zi va jamiyatning salomatligini himoya qilmasligi kerak? Axir boshqa yo‘limiz yo‘q-ku. Doka niqob taqmayapmiz, ijtimoiy masofaga rioya qilmayapmiz, antiseptik vositalarni unutdik. Jamoat transportlaridan emin-erkin foydalanyapmiz. Qariyb chegaralash bo‘lmayapti. Bu hayot. Odamlarning iqtisodiy imkoniyatlari kamayib ketmasin, yana qamalib uyda o‘tirib qolmasin, degan nuqtayi nazardan jiddiy karantin choralari tadbiq qilinmayapti. 

Yana barcha tashkilotlar faoliyatini to‘xtatib, lokdaun holatini joriy qilib, kasallikni yengish uchun bir qadam oldinga yurish mumkin edi. Lekin davlatimiz, qolaversa Respublika maxsus komissiyasi mana shu jihatlarni har tomonlama o‘ylab, kasallik bor bo‘lgan vaqtda yashash, faoliyat ko‘rsatish, iqtisodiy foyda ko‘rish imkoniyatini saqlab qolish nuqtayi nazaridan karantin cheklov choralarini kuchaytirib yubormayapti. Aniq bilamanki, bunga Hukumat har taraflama ongli ravishda yondashyapti. Lekin, juda ilojsiz bo‘linganidan u yoki bu cheklovlar oz-ozdan kuchaytirib borilmoqda. Negaki, belgilangan talablar ham buzilishi boshlanyapti. Shu bois menga qolsa, emlashni majburiy qilgan bo‘lardim”. 

Ma’lumot o‘rnida, O‘zbekistonda 2020 yilning 15 martidan buyon 2021 yilning 7 iyuliga qadar 114 529 kishida koronavirus aniqlangan. Virus yuqtirib olganlarning 110 041 nafari kasallikdan sog‘aygan. 

Bugungacha Saudiya Arabistoni, Tojikiston, Turmanistonda koronavirusga qarshi emlanish majburiy etib belgilangan. Rossiyada esa vaksina olmaganlarga nisbatan bir qator cheklovlar o‘rnatilgan.