O‘zbekiston dunyodagi eng xavfsiz mamlakatlardan biri bo‘ldi

O‘zbekiston dunyodagi eng xavfsiz davlatlardan biri deya qayd etildi. Ushbu ma’lumot dunyodagi yetakchi sog‘liqni saqlash va xavfsizlik xizmatlari kompaniyasi hisoblangan International SOS’ning odamlar hayoti uchun xavfsiz mamlakatlar haqidagi hisobotida keltirilgan.

Ma’lumotlarga ko‘ra, bu borada O‘zbekiston AQSH, Ispaniya, Shvetsiya, Buyuk Britaniya, Qatar, Fransiya kabi davlatlar bilan bir ro‘yxatdan joy olgan.

“Zo‘ravonlik jinoyatlari darajasi juda past. Hech qanday siyosiy tazyiq, fuqarolarning tartibsizliklari va chet elliklarga nisbatan diniy yoki irqiy tajovuz kuzatilmaydi. Xavfsizlik va favqulodda vaziyatlar xizmatlari samarali tashkil etilgan. Infratuzilma mustahkam. Transport xizmatlari yuqori standartlarga ega, xavfsizlik qoidalari kuchli va faqat vaqti-vaqti bilangina sayohatlar to‘xtatilishi mumkin”, deya ta’rif beriladi xavfsizlik yuqori bo‘lgan mamlakatlarga.

Tahlil natijalariga ko‘ra, eng xavfli davlatlar sifatida esa Afg‘oniston, Mali, Liviya, Iroq, Suriya, Yaman va Ukraina qayd etilgan.

Sohiba Komilovna