“O‘zavtosanoat” rahbari Ulug‘bek Ro‘ziqulov gimnastika federatsiyasi raisi bo‘ldi

Ulug‘bek Ro‘ziqulov O‘zbekiston gimnastika federatsiyasining raisi etib saylandi. Bu haqda O‘zbekiston Milliy Olimpiya qo‘mitasi Matbuot xizmati xabar berdi.

Keltirilishicha, kecha, 18 iyun kuni O‘zbekiston Milliy Olimpiya qo‘mitasida O‘zbekiston gimnastika federatsiyasining navbatdan tashqari hisobot-saylov konferensiyasi bo‘lib o‘tgan. Unda federatsiyaning avvalgi rahbari boshqa ishga o‘tgani munosabati bilan tashkilotga yangi rais saylash konferensiya kun tartibidagi asosiy masala ekani ta’kidlangan. MOQ Bosh kotibi Oybek Qosimov ushbu lavozimga federatsiya bosh homiysi “O‘zavtosanoat” AK boshqaruv raisi Ulug‘bek Ubaydullayevich Ro‘ziqulov nomzodini ilgari surgan. Konferensiya qatnashchilari bir ovozdan ushbu nomzodni qo‘llab-quvvatlagan va Ulug‘bek Ro‘ziqulov O‘zbekiston gimnastika federatsiyasining raisi etib saylangan.

O‘z navbatida Ro‘ziqulov Prezident Shavkat Mirziyoyevning “Gimnastika sport turlarini yanada rivojlantirish chora-tadbirlari to‘g‘risida”gi Qarori ijrosini ta’minlash, mavjud muammo va masalalarni hal etish, gimnastika rivojini yangi bosqichga olib chiqish yo‘lida bor kuch-g‘ayratini safarbar qilishini ta’kidlagan. Shuningdek, u hududlarga e’tiborni yanada kuchaytirish, viloyatlardagi moddiy-texnik bazani kuchaytirish, sportchilarni har tomonlama rag‘batlantirish kabi masalalarga ham to‘xtalgan. Shu bilan birga Yoshlar siyosati va sport vazirining o‘rinbosari Shahrullo Mahmudov tadbirga onlayn tarzda ishtirok etib, unga o‘zbekistonlik sportchilarning Xanchjou-2022 Osiyo va Parij-2024 Olimpiya o‘yinlarida munosib ishtiroklarini ta’minlash kabi mas’uliyatli vazifalarni bajarish yo‘lida kuch-quvvat tilagan.

Ma’lumot uchun, mazkur federatsiyani bir paytlar O‘zbekiston Respublikasining Birinchi Prezidenti Islom Karimovning kenja qizi Lola Karimova-Tillyayeva boshqarib, 2018 yilning 6 mart kuni federatsiya prezidenti lavozimini tark etgan.

Eslatib o‘tamiz, bunga qadar federatsiyani “O‘zavtosanoat”ning avvalgi rahbari Shavkat Umurzoqov boshqargan. Mart oyida u Toshkent shahri hokimi vazivasini bajaruvchi etib tayinlangan. Keyinroq Ulug‘bek Ro‘zuqulov “O‘zavtosanoat” rahbari sifatida e’lon qilingandi.