Turkiy davlatlar kasaba uyushmalari tashkiloti tuzildi

Ozarbayjonning madaniy poytaxti Shusha shahrida tarixiy voqea yuz berdi – to‘rt turkiy davlat – Qozog‘iston, Ozarbayjon, Turkiya va O‘zbekiston Milliy kasaba uyushma markazlari o‘rtasida yangi yagona birlashgan tuzilma – Turkiy davlatlar kasaba uyushmasi tashkilotini tuzish to‘g‘risida shartnoma imzolandi. Bu haqda Kazinform xabar berdi.

Bitimni Ozarbayjon kasaba uyushmalari konfederatsiyasi raisi Sattor Moxbaliyev, Qozog‘iston Respublikasi Kasaba uyushmalari federatsiyasi raisi Satibaldi Dauletalin, “Türk-İş” Turkiya kasaba uyushmalari konfederatsiyasi prezidenti Yergyun Atalay, O‘zbekiston Kasaba uyushmalari federatsiyasi raisi o‘rinbosari Baxtiyor Mahmadaliyev imzoladi. Qirg‘iziston esa tashkilotda kuzatuvchi sifatida qatnashadi.

Yangi tuzilmaning asosiy maqsadi – mehnatkashlarning ijtimoiy, mehnat, kasbiy va iqtisodiy huquq va manfaatlarini himoya qilishga qaratilgan chora-tadbirlarni birlashtirishdan iborat.

Sattor Moxbaliyevning fikricha, kasaba uyushmasining tashkil etilishi turk davlatlarining birlashishi uchun mustahkam zamin yaratadi.
Turkiy xalqlarning maqsad va manfaatlari bir ekanini Qozog‘iston Respublikasi Kasaba uyushmalari federatsiyasi raisi Satibaldi Dauletalin alohida ta’kidladi.

“Biz, qardosh turkiy xalqlar vakillarini mushtarak tarixiy ildiz, mushtarak madaniyat va an’ana, mushtarak maqsad va mushtarak manfaatlar birlashtirib turadi. Shuni alohida ta’kidlashni istardimki, turkiy davlatlar nafaqat umumiy manfaatlar, balki ko‘p asrlik tarixga ham ega. So‘nggi o‘ttiz yilda turkiy tilli mamlakatlar hamkorligi bu mexanizmni hukumatlararo tashkilotdan (Turkiy Kengash) mintaqaviy xalqaro tashkilot (TMB)gacha muvaffaqiyatli rivojlantirdi va takomillashtirdi”, – dedi u.

Satibaldi Dauletalin kelgusidagi hamkorlikning asosiy yo‘nalishlaridan biri sifatida ilg‘or kasaba uyushmalari amaliyotini targ‘ib etish, tajriba almashish Turkiy davlatlarning mehnat bozoridagi vaziyatini o‘zgartirishini ta’kidladi.

Akobir Sayidov