Toshkentdagi mahallada simyog‘ochdan o‘tgan elektr simi yonib ketdi (video)

Ijtimoiy tarmoqlarda Toshkent shahar Yakkasaroy tumanida elektr uzatish havo tarmog‘idagi kabel yonib ketgani haqida videomurojaat tarqaldi. Holat yuzasidan “Hududiy elektr tarmoqlari” aksiyadorlik jamiyati ma’lumot berdi.

Unga ko‘ra, bugun, 15 dekabr kuni Yakkasaroy tumani “Muqumiy” ko‘chasidagi xonadonlarni elektr energiyasi bilan ta’minlovchi havo elektr uzatish tarmog‘ida yuklama ortib ketgan. Simlarning qisqa tutashuvi esa yong‘inni keltirib chiqargan.

Qayd etilishicha, respublika bo‘ylab havo haroratining keskin sovib ketishi gaz bosimining pasayishiga sabab bo‘lmoqda. Oqibatda elektr energiyasiga bo‘lgan talab oshib, joylardagi mavjud past kuchlanishli elektr uzatish tarmoqlarida avariyali uzilish holatlari yuzaga kelmoqda.

“Ayni vaqtda, Yakkasaroy tumani elekt tarmoqlari korxonasining tezkor guruh ishchi-xodimlari tomonidan avariyani tezkorlik bilan bartaraf etish uchun barcha zarur choralar ko‘rilib, hududlarda tezkor chiqish brigadalari tomonidan ta’mirlash ishlari olib borilib, avariya holati bartaraf etilmoqda”, deyiladi xabarda.