Toshkentda tez yordam va yuk avtomobili to‘qnashdi 

Joriy yilning 22 sentyabr kuni Toshkent shahrida Hyundai rusumli tez tibbiy yordam va “GAZ-330210” rusumli yuk avtomobili o‘rtasida yo‘l-transport hodisasi yuz berdi. Bu haqda Ichki ishlar vazirligi Yo‘l harakati xavfsizligi Bosh boshqarmasi Matbuot xizmati xabar berdi. 

Qayd etilishicha, soat 20:45 atrofida Shayxontohur tumanining Nurafshon va M.Uyg‘ur ko‘chalari kesishgan chorrahada YTH yuz bergan. 1989 yilda tug‘ilgan haydovchi D.E. boshqaruvidagi “GAZ-330210” rusumli yuk avtomobili hamda 1959 yilda tug‘ilgan haydovchi M.E. boshqaruvida bo‘lgan Hyundai rusumli tez tibbiy yordam avtomobili ishtirokida to‘qnashuv sodir bo‘lgan.

YTH oqibatida tan jarohati olganlar yo‘q. Transport vositalariga esa texnik shikast yetgan.

Xabarga ko‘ra, mazkur YTH yuzasidan Toshkent shahar IIBB YHXB xodimlari tomonidan surishtiruv olib borilmoqda.

Eslatib o‘tamiz, joriy yilning avgustida poytaxtning Chilonzor tumanida Nexia va tez yordam mashinasi to‘qnashgan va buning oqibatida tez tibbiy yordam avtomobili yo‘lovchisi shifoxonada vafot etgandi.