Toshkentda texnopark ichidagi sex yonib ketdi 

Toshkent shahri Yakkasaroy tumanidagi texnopark hududida joylashgan ishlab chiqarish sexida yong‘in sodir bo‘ldi. Bu haqda Favqulodda vaziyatlar vazirligi xabar berdi. 

Qayd etilishicha, bugun, 1 sentyabr kuni soat 16:26 da Qushbegi dahasida joylashgan Yakkasaroy texnoparki hududidagi ishlab chiqarish sexining tom va ichki qismida taxminan 1000 kvadrat metr maydonida yong‘in sodir bo‘lgan.

Shunga ko‘ra, yong‘in-qutqaruv ekipajlari soat 16:31da hodisa joyiga yetib borgan hamda yong‘inni soat 17:29 da qurshab olib, soat 18:07 da bartaraf etgan.

Voqea joyiga O‘zbekiston Respublikasi FVV rahbariyati, Toshkent shahar FVB va tuman FV bo‘limi rahbar xodimlari yetib borgan.

Yong‘inni bartaraf etishga 11 ta yong‘in-qutqaruv ekipaji, 2 ta maxsus suv tashishga mo‘ljallangan (vodovoz) avtomobil, 1 ta qutqaruv otryadi ekipaji jalb etilgan. 

Hodisa oqibatida fuqarolarning tan jarohati olishi va halok bo‘lishi holatlari to‘g‘risida xabar kelib tushmagan. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.