Toshkentda kinochilar uchun 9 qavatli uylar quriladi

Jamiyat 3301
image

O‘zbekiston Respublikasi Prezidentining 2020 yil 20 noyabr kuni “O‘zbekfilm” kinostudiyasiga tashrifi davomida “O‘zbekfilm” DUK hududida milliy kinematografiya sohasi ijodkorlari, mutaxassislari va xodimlari uchun ko‘p qavatli ikkita turar-joy binosini qurish va bozor tamoyillariga asoslangan ipoteka kreditlarini ajratish vazifasi topshirilgandi.

Normativ-huquqiy hujjatlar loyihalari muhokamasi portalida “Milliy kinematografiya sohasi ijodkorlari, mutaxassislari va xodimlarini uy-joy bilan ta’minlash chora-tadbirlari to‘g‘risida”gi Prezident qarori loyihasi e’lon qilindi.

Unga muvofiq, ikkita 9 qavatli uylar 2021 yilning 31 dekabriga qadar foydalanishga topshiriladi. Qurilgan uylarning 20 foizi bepul “O‘zbekfilm” DUKga xizmat uylari sifatida beriladi.

Ko‘p kvartirali uy-joylar faqatgina milliy kinematografiya sohasi ijodkorlari, mutaxassislari va xodimlari uchun bozor tamoyillariga asoslangan ipoteka kreditlari orqali beriladi.

“O‘zbekkino” Milliy agentligi uy-joylar qurib bitkazilgandan so‘ng bir oylik muddatda turar joy sharoitlarini yaxshilashga extiyoji bor, kamida 5 yil shu sohada faoliyat yuritgan milliy kinematografiya sohasi ijodkorlari, mutaxassislari va xodimlari ro‘yxatini shakllantirib, ularga kvartiralar ajratadi.

Sunnatilla Abdullayev
Maqolaga baho bering
Baholaganlar: 85
Reyting: 3
t
×