Toshkentda 5 ta avtomobil ishtirokida YTH sodir bo‘ldi

Kecha, 7 oktyabr kuni Toshkent shahrida 5 ta avtomobil ishtirokida yo‘l-transport hodisasi sodir bo‘ldi. Bu haqda IIBB Yo‘l harakati xavfsizligi boshqarmasi xabar berdi.

Qayd etilishicha, holat soat 22:10 larda Uchtepa tumani Lutfiy ko‘chasida sodir bo‘lgan. Haydovchi 2000 yilda tug‘ilgan I.I. boshqaruvidagi Nexia-3 rusumli avtomashinasi, 1990 yilda tug‘ilgan haydovchi ayol A.X. boshqaruvidagi Lacetti rusumli avtomashinasi, 1984 yilda tug‘ilgan haydovchi J.B.  boshqaruvidagi Lacetti rusumli transport vositasi, haydovchi 1994 yilda tug‘ilgan A.A. boshqaruvidagi Spark rusumli transport vositasi, haydovchi 1976 yilda tug‘ilgan X.H. boshqaruvidagi YUTONG rusumli transport vositalari to‘qnashishi oqibatida yo‘l-transport hodisasi sodir bo‘lgan.

“YTH oqibatida tan jarohat olganlar yo‘q. Holat yuzasidan Toshkent shahar IIBB YHXB mas’ul xodimlari tomonidan surishtiruv harakatlari olib borilmoqda”, deyiladi xabarda.

Eslatib o‘tamiz, 2 oktyabr kuni Namangan viloyatida maktab va texnikum o‘quvchilari boshqaruvidagi Gentra hamda yuk mashinasi o‘rtasida dahshatli yo‘l-transport hodisasi sodir bo‘lgandi.